Adhyaya 15

Couplet 1

କହନ୍ତି ବ୍ୟାସଙ୍କର ସୁତଶୁଣ ସୁମନେ ପରୀକ୍ଷିତ

Couplet 2

ଏମନ୍ତେ ପୁତ୍ରଙ୍କର ରିଷ୍ଟସେ ଦେବମାତା ମନେ କଷ୍ଟ

Couplet 3

ଇନ୍ଦ୍ରର ଇନ୍ଦ୍ରପଣ ଗଲାଗିରି-ଦୁର୍ଗମେ ଆଶ୍ରେ କଲା

Couplet 4

ଦେବେ ଲୁଚିଲେ ଘୋରବନେଶୁଣି ଅଦିତି ଦୁଃଖ ମନେ

Couplet 5

ରାତ୍ର-ଦିବସ ନ ଜାଣଇନିରତେ ଥାଏ ଗୃହେ ଶୋଇ

Couplet 6

ତାର ଭୁବନେ ଏକବେଳେକଶ୍ୟପ ଋଷି ବିଜେ କଲେ

Couplet 7

ଅଦିତି ଶୟନ ସମୀପେକଶ୍ୟପ ବସି ମନସ୍ତାପେ

Couplet 8

ଦେଖିଲେ ଅଦିତିଭୁବନଅଷ୍ଟସମ୍ପଦ ଅତିହୀନ

Couplet 9

ଉତ୍ସବ ଆନନ୍ଦ ନ ଦିଶେଆଦିତ୍ୟ ଯେହ୍ନେ ଧୂମତ୍ରାସେ

Couplet 10

ଶୟନ ସେ କୁଶ ଆସନେଚାହିଁଲେ ଅଦିତି ବଦନେ

Couplet 11

ଦେଖିଲେ ମୁଖେ ସୁଖ ନାହିଁଶୋକଆକୁଳେ କମ୍ପେ ଦେହି

Couplet 12

ଶୋକ-କଳୁଷ ଦେଖି ମନବୋଲନ୍ତି ମରୀଚିନନ୍ଦନ

Couplet 13

ଶୁଣ ସୁନ୍ଦରୀ ଶୁଦ୍ଧଚିତ୍ତେକହଇ ତୋହର ଅଗ୍ରତେ

Couplet 14

ବ୍ରହ୍ମା ସଞ୍ଚିତ ସୃଷ୍ଟିମଧ୍ୟେବ୍ରାହ୍ମଣେ ବସନ୍ତି ଆନନ୍ଦେ

Couplet 15

ତାହାଙ୍କ ଗୃହେ ଦୁଃଖ ନାହିଁଏବେ ବିପରୀତ ଦେଖଇ

Couplet 16

ଧନସମ୍ପଦ ସୁଖ ନୋହେଶୁଣ ନିଗମ ଯାହା କହେ

Couplet 17

ଅଶେଷ ବିଷ୍ଣୁର ଜଗତକର୍ମର ବଳେ ଆତଯାତ

Couplet 18

ଶୁଭ-ଅଶୁଭ ଭାବବଳେକାଳ କ୍ରୀଡ଼ଇ ଅନ୍ତରାଳେ

Couplet 19

କାଳର ବଶ ଏ ସଂସାରକେ ଭୃତ୍ୟ କେ ଅବା ଈଶ୍ୱର

Couplet 20

ଭୋଗ ସମ୍ପଦ ଅର୍ଥ ଗୃହେପ୍ରାଣୀ ସାଧନ୍ତି ଅତି ମୋହେ

Couplet 21

ଏ ଭାବେ ସଂସାର ରଚିତକିବା ହୋଇଲା ଆଚମ୍ବିତ

Couplet 22

ବିପ୍ର ଅତିଥି କିବା ଘରେକୁଟୁମ୍ବ ଭରଣ ବେଭାରେ

Couplet 23

ପୂଜା ନ ପାଇ ଏ ଭୁବନେକି ଅବା ଗଲେ ଦୁଃଖମନେ

Couplet 24

ଯା ପୁରୁ ଅତିଥି ବାହୁଡ଼େସେ ପ୍ରାଣୀ ପ୍ରେତ ମୁଖେ ପଡ଼େ

Couplet 25

ତାର ସଞ୍ଚଲା ପୁଣ୍ୟ ଯେତେଗମନ୍ତି ଅତିଥି ସଙ୍ଗତେ

Couplet 26

ଅଗ୍ନିରେ ଯଥାକାଳେ ହବିନ ଦେଇ ହୁଅ ପରାଭବୀ

Couplet 27

ମୋର ପ୍ରବାସେ ତୋର ଚିତ୍ତକିବା ହୋଇଲା ମୋହଗତ

Couplet 28

ଅଗ୍ନି-ପୂଜନେ ଶୁଦ୍ଧମନେସେ କାମଧେନୁ ଯଜମାନେ

Couplet 29

ସମ୍ପଦ ବିପ୍ରଜନେ ଦ୍ୟନ୍ତିଦେବେ ଯେ କଲ୍ୟାଣ ବାଞ୍ଛନ୍ତି

Couplet 30

ବିପ୍ର ଅଗ୍ନିକି ନ ପୂଜିଲେକଲ୍ୟାଣ ଲଭେ କାହିଁ ଭଲେ

Couplet 31

ହରିଙ୍କି କାହିଁ ସେ ପାଇବଯାକୁ ନ ପାନ୍ତି ବ୍ରହ୍ମାଶିବ

Couplet 32

ଉଭୟ ଲୋକେ ନାହିଁ ସୁଖସର୍ବଦା ଲଭନ୍ତି ବିମୁଖ

Couplet 33

ତୋର ତନୁଜ ଦେବତାଏସ୍ୱର୍ଗେ ଅଛନ୍ତି ନା ନିର୍ଭୟେ

Couplet 34

ଇନ୍ଦ୍ରର କୁଶଳ ନ ଦେଖିକିବା ହୋଇଛୁ ମନେ ଦୁଃଖୀ

Couplet 35

ଏମନ୍ତ ସ୍ୱାମୀବାକ୍ୟ ଶୁଣିକହଇ ଦକ୍ଷର ଦୁଲଣୀ

Couplet 36

ଗୋରୁ-ବ୍ରାହ୍ମଣ-ସୃଷ୍ଟିଲୋକେଏ ସର୍ବେ ଛନ୍ତି ନାନାସୁଖେ

Couplet 37

ଧର୍ମ ହିଁ ଅଛି ମୋର ପୁରେଆଗମ ନିଗମ ବେଭାରେ

Couplet 38

ତ୍ରିବର୍ଗ ମୋହର ଭୁବନେକେବେହେଁ ନ ତୁଟଇ ଦିନେ

Couplet 39

ଅଗ୍ନି-ଅତିଥି ମୋର ଗୃହେନିରାଶ ନୁହଁନ୍ତି କେବେହେଁ

Couplet 40

ସକଳ ଶୁଭ ତୁମ୍ଭ ବଳେଯେ ଯାହା କର୍ମର କୁଶଳେ

Couplet 41

ତୁମ୍ଭେ କହିଲ ଯେତେ ଧର୍ମଗୃହସ୍ଥ ସ୍ୱଭାବେ ଯେ କର୍ମ

Couplet 42

ସର୍ବସମ୍ପଦେ ମୋର ଚିତ୍ତକେବେହେଁ ନୁହଁଇ ମୋହିତ

Couplet 43

ତୁମ୍ଭେ ଯେ ଦେବଙ୍କ କୁଶଳେନିରତେ ଭଜ ଯୋଗବଳେ

Couplet 44

ଏ ସୃଷ୍ଟିମଧ୍ୟେ ଯେତେ ଜନସକଳେ ତ୍ରିଗୁଣେ ବନ୍ଧନ

Couplet 45

ଅର୍ଜିଲା କର୍ମର ଆୟତ୍ତେଜନ୍ତୁ ସଞ୍ଚରନ୍ତି ଜଗତେ

Couplet 46

ତଥାପି ଭକ୍ତକୁ ଭଜନ୍ତିବ୍ରହ୍ମା ଶଙ୍କର ଲକ୍ଷ୍ମୀପତି

Couplet 47

ଶୁଣ ହେ ସ୍ୱାମୀ ବ୍ରହ୍ମାସୁତତୁମ୍ଭ ପ୍ରସାଦେ ମୋର ଚିତ୍ତ

Couplet 48

ଦୁର୍ଲ୍ଲଭ ଚତୁର୍ବର୍ଗ ନୋହେସେବକୀ ପଣେ ତୁମ୍ଭ ଗୃହେ

Couplet 49

ତୁମ୍ଭର ଚିତ୍ତ ପ୍ରଜାହିତେଯେ ଧର୍ମ କହ ମୋ ଅଗ୍ରତେ

Couplet 50

ତୁମ୍ଭର ପୁତ୍ର ଦୁଇମତେଦେବ-ଅସୁର ଏ ଜଗତେ

Couplet 51

ଏହାଙ୍କ ଭଲ ତୁମ୍ଭେ ଇଚ୍ଛଏହା ମୁଁ ଦେଖଇ ପ୍ରତ୍ୟକ୍ଷ

Couplet 52

ମୋ ପୁତ୍ରେ ସତ୍ତ୍ୱଗୁଣେ ଥାନ୍ତିଅସୁରେ ରଜ-ତମ ଚିନ୍ତି

Couplet 53

ପୀଡ଼ା କରନ୍ତି ସାଧୁଜନେଧର୍ମ ରଖନ୍ତି ମୋ ନନ୍ଦନେ

Couplet 54

ମୋ ସୁତେ ଅସୁରଙ୍କ ଡରେଲୁଚିଲେ ବନ-ଗିରି ଘୋରେ

Couplet 55

ଇନ୍ଦ୍ରକୁ ନ ଦେଖି ମୋ ମନନିରତେ ହୁଏ ଛନଛନ

Couplet 56

କହ କି କରିବି ଉପାୟେକେମନ୍ତେ ଇନ୍ଦ୍ର ସ୍ୱର୍ଗେ ରହେ

Couplet 57

ମୋର ସପତ୍ନୀପୁତ୍ର ବଳେବିଚାର କରି ଗୁରୁମେଳେ

Couplet 58

ଶୁକ୍ରର ମନ୍ତ୍ରବଳ-ତେଜେବଳି ବସିଲା ସ୍ୱର୍ଗରାଜ୍ୟେ

Couplet 59

ମିଳିଲେ ଅନେକ ଦାନବହରିଲେ ଇନ୍ଦ୍ରର ବିଭବ

Couplet 60

ସେ ଏବେ ହୋଇ ସ୍ଥାନଭ୍ରଷ୍ଟଅନେକ ପାଉଅଛି କଷ୍ଟ

Couplet 61

ମୋ ତହୁଁ ଦୁଃଖୀ କେ ଶୟଳେକହିଲି ତୁମ୍ଭ ପାଦତଳେ

Couplet 62

ତୋର କୁମରେ ଭଲେ ଥିବେମୋ ପୁତ୍ରେ ସ୍ୱସ୍ଥାନେ ରହିବେ

Couplet 63

ଏମନ୍ତ ଆଜ୍ଞା ମୋତେ କରତୁମ୍ଭେ ତ ବୁଦ୍ଧିରେ ଈଶ୍ୱର

Couplet 64

ଏମନ୍ତ ଅଦିତି ବଚନେକଶ୍ୟପ ବିଚାରନ୍ତି ମନେ

Couplet 65

ଦେଖ ଏ ବିଷ୍ଣୁମାୟା ବଳେଜୀବର ବନ୍ଧନ ଶୟଳେ

Couplet 66

ପଞ୍ଚଭୌତିକ ଏ ଶରୀରଆତ୍ମା ନିର୍ଲେପ ନିରାକାର

Couplet 67

ଶରୀର ପତ୍ନୀ ପୁତ୍ର ଆଦିଏ ବିଷ୍ଣୁ ମାୟାରେ ସମ୍ପାଦି

Couplet 68

କେ ଏହା ଅନ୍ୟଥା କରିବବ୍ରହ୍ମା ଶଙ୍କର ବାସୁଦେବ

Couplet 69

ପତ୍ନୀର ବଚନ ପ୍ରଶଂସିକହନ୍ତି ପ୍ରଜାପତି ହସି

Couplet 70

ତୁ ଏବେ ମୋର ବୋଲ କରହରି ଚରଣ ମନେ ଧର

Couplet 71

ସେ ହରି ତୋର ମନଦୁଃଖନିବାରି ଦେବେ ସ୍ୱର୍ଗସୁଖ

Couplet 72

ଆରତ ଜନ-ବନ୍ଧୁ ହରିସେ ପାରେ ଆରତ ନିବାରି

Couplet 73

ଯାର ଚରଣ ଆଶ୍ରେ କଲେସଙ୍କଟୁ ତରେ ପ୍ରାଣୀ ଭଲେ

Couplet 74

ତାର ଚରଣେ ସେବା କରନିର୍ଭୟେ ମନଦୁଃଖୁଁ ତର

Couplet 75

କଶ୍ୟପ ମୁଖୁଁ ଏହା ଶୁଣିଅଦିତି କହେ ଯୋଡ଼ି ପାଣି

Couplet 76

ଭୋ ନାଥ କହ ବୁଦ୍ଧି ମୋତେହରିଙ୍କି ସେବିବି କେମନ୍ତେ

Couplet 77

ଯେମନ୍ତେ ମୋର ମନୋରଥସଫଳ କରେ ଜଗନ୍ନାଥ

Couplet 78

ପୁତ୍ର ବସିଣ ଇନ୍ଦ୍ରପଦେଭୋ ନାଥ ନମେ ତୋର ପାଦେ

Couplet 79

ଏମନ୍ତେ ପତ୍ନୀ-ବାକ୍ୟ ଶୁଣିବ୍ରହ୍ମାନନ୍ଦନ ମନେ ଗୁଣି

Couplet 80

ବୋଲନ୍ତି ଶୁଣ ମୋ ଘରଣୀହରିତୋଷଣ ସେବାବାଣୀ

Couplet 81

ଯେ ବ୍ରତେ ପ୍ରଭୁ ହୃଷୀକେଶତୋହର ଉଦରେ ପ୍ରବେଶ

Couplet 82

ସେ ବିଷ୍ଣୁ ଦ୍ୱିଜ ଖର୍ବ ରୂପେବଳିକି ଛଳି ଦାନକଳ୍ପେ

Couplet 83

ତୋର ପୁତ୍ରକୁ ସେ ରଖିବତୁ ଏବେ ହରି ପାଦେ ସେବ

Couplet 84

ହରିତୋଷଣ ବ୍ରତ କରଏ ଦୁଃଖସାଗରୁ ନିସ୍ତର

Couplet 85

ଶୁଣ କହିବା ବେଦମତେଏ ବ୍ରତ କରିବୁ ଯେମନ୍ତେ

Couplet 86

ଫାଲ୍‌ଗୁନ-ଶୁକ୍ଳପକ୍ଷ-ଯୁତେଦ୍ୱାଦଶଦିନ ପୟେ ବ୍ରତେ

Couplet 87

ଅର୍ଚ୍ଚନ କରି ଭକ୍ତିବଳେଶ୍ରୀକୃଷ୍ଣ ଚରଣ କମଳେ

Couplet 88

ସେବା କରିବ ଯେବାମତେଶୁଣ କହିବା କଳ୍ପ ତୋତେ

Couplet 89

ପ୍ରାତହୁଁ ଅମାବାସ୍ୟା ଦିନମନ୍ଦିରୁ ଗମିବ ବହନ

Couplet 90

ବରାହ ଦନ୍ତ ଖାତେ ଯାଇମୃତ୍ତିକା ବାମ ହସ୍ତେ ଲଇଁ

Couplet 91

ଶୁଣ ମନ୍ତ୍ରିବ ଯେଉଁ ମନ୍ତ୍ରେଅଙ୍ଗେ ଘେନିବ ଯେବା ତନ୍ତ୍ରେ

Couplet 92

ଭୋ ଦେବି ତୁ ଯେ ଅନ୍ତଃକାଳେନିମଗ୍ନେ ଥିଲୁ ମହାଜଳେ

Couplet 93

ପାତାଳ-ଜଳ-ପଙ୍କେ ଥିଲୁବରାହ-ଦଶନେ ଉଠିଲୁ

Couplet 94

ବରାହ-ଦନ୍ତ-ଅଗ୍ରବାସୀତୁ ମୋର ହର ପାପରାଶି

Couplet 95

ଏମନ୍ତେ ମୃତ୍ତିକା ମନ୍ତ୍ରିବଶରୀର- ସର୍ବାଙ୍ଗେ ଲେପିବ

Couplet 96

ସ୍ନାନ କରିବ ପ୍ରାତଃକାଳେସୂର୍ଯ୍ୟ-ଉଦୟେ ଶୁଦ୍ଧଜଳେ

Couplet 97

ମାର୍ଜନା ସାରି ଶୁଦ୍ଧଗାତ୍ରେସଂଯମ ଆତ୍ମା ଶୁଦ୍ଧଚିତ୍ତେ

Couplet 98

ମୂର୍ତ୍ତିରେ ଅଥବା ଅନଳେସ୍ଥଣ୍ଡିଳେ ଆଦିତ୍ୟମଣ୍ଡଳେ

Couplet 99

ଜଳେ ଅଥବା ଗୋରୁଗାତ୍ରେଅର୍ଚ୍ଚନା କରିବ ଏ ମତେ

Couplet 100

ଏମନ୍ତେ ପୂଜାସ୍ଥାନେ ଚିନ୍ତିଶୁଣ କରିବ ଯେବା ସ୍ତୁତି

Couplet 101

ନମସ୍ତେ ପ୍ରଭୁ ଭଗବାନମହାପୁରୁଷ ଶୁଦ୍ଧଧାମ

Couplet 102

ହେ ଭଗବତ ନମସ୍ତୁତେସାକ୍ଷୀ ସ୍ୱରୂପ ଏ ଜଗତେ

Couplet 103

ସକଳ-ଭୂତର ନିବାସନମସ୍ତେ ପ୍ରଧାନ ପୁରୁଷ

Couplet 104

ଚତୁର୍ବିଂଶତି-ଗୁଣ-ଜ୍ଞାତାଗୁଣ ସଂଖ୍ୟାନେ ହେତୁ କର୍ତ୍ତା

Couplet 105

ଦ୍ୱିଶିର ତ୍ରିରଚରଣ ତୁହିଚରଇ ଶୃଙ୍ଗ ତନ୍ତୁ ଦେହୀ

Couplet 106

ସପତହସ୍ତ ଯଜ୍ଞରୂପୀଆତ୍ମା ତୋ ତିନିବେଦ ବ୍ୟାପୀ

Couplet 107

ନମସ୍ତେ ଶିବ-ରୁଦ୍ରବରନମସ୍ତେ ସର୍ବ-ଶକ୍ତିଧର

Couplet 108

ସକଳ ବିଦ୍ୟା ଅଧିପତିସର୍ବଭୂତଙ୍କ ଆତ୍ମାଗତି

Couplet 109

ହିରଣ୍ୟଗର୍ଭ ନମୋନମଜଗତ-ପ୍ରାଣ ଆତ୍ମାରାମ

Couplet 110

ଯୋଗ-ଐଶ୍ୱର୍ଯ୍ୟ ଯା ଶରୀରଯୋଗର ହେତୁ ଯୋଗେଶ୍ୱର

Couplet 111

ନମସ୍ତେ ଆଦିଦେବଦେବନମସ୍ତେ ସଂସାର-ପ୍ରଭବ

Couplet 112

ନମସ୍ତେ ନର-ନାରାୟଣନମସ୍ତେ ପରମ-କଲ୍ୟାଣ

Couplet 113

ନମୋ ମର୍କତ-ଶ୍ୟାମ-ଦେହନମସ୍ତେ କମଳା-ଆଶ୍ରୟ

Couplet 114

ନମୋ ଗୋବିନ୍ଦ ପୀତବାସନମସ୍ତେ ଭକତ-ବିଶ୍ୱାସ

Couplet 115

ନମସ୍ତେ ସର୍ବବରଦାତାନମସ୍ତେ ସର୍ବ ମାତାପିତା

Couplet 116

ଶରଣ ଜନେ ରକ୍ଷାକରୁନମୋ ଭକତ-କଳ୍ପତରୁ

Couplet 117

ତୋ ପାଦରେଣୁ ଧରି ଶିରେମୋକ୍ଷ-ସାଧନ ଯୋଗବଳେ

Couplet 118

ଯେ ପାଦପଦ୍ମେ ଭକ୍ତ ସେବେଭାବେ ଖଟନ୍ତି ଦେବୀଦେବେ

Couplet 119

ତୋ ପାଦସରୋଜ-ସୁବାସେଅଶେଷ-ଭବଭୟ ନାଶେ

Couplet 120

ଏମନ୍ତେ ଆବାହନ କରିନିଶ୍ଚଳଚିତ୍ତେ ଭାବଭରି

Couplet 121

ଏମନ୍ତେ ପାଦ୍ୟ ଅର୍ଘ୍ୟ ଆଦିଶ୍ରଦ୍ଧା-ଭକତିରେ ନିବେଦି

Couplet 122

ଅର୍ଚ୍ଚନା କରି ଗନ୍ଧମାଲ୍ୟେପୂଜିବ ଆନନ୍ଦେ ନିଶ୍ଚଳେ

Couplet 123

ଉତ୍ତମ ବସ୍ତ୍ର-ଅଳଙ୍କାରସୁଗନ୍ଧ-ଧୂପ ମନୋହର

Couplet 124

ନୈବେଦ୍ୟ କରି ଷଡ଼ରସେପୂଜିବ ପ୍ରପାନ-ପାୟସେ

Couplet 125

ଦଧି-ଶାକର-ମଧୁ-ଘୃତେସୁଶାଳିଅନ୍ନ ଦୁଗ୍ଧଯୁତେ

Couplet 126

ନାନା ପ୍ରକାରେ ଭୋଗ ଦେଇହୃଦେ ଭକତିଭାବ ବହି

Couplet 127

ଯେ ମନ୍ତ୍ର ଦ୍ୱାଦଶ ଅକ୍ଷରଜପିବ ଶହେଆଠ ବାର

Couplet 128

ହୋମ କରିବ ହୁତାଶନେଉଚ୍ଚାରି ମୂଳମନ୍ତ୍ର ଧ୍ୟାନେ

Couplet 129

ଶ୍ରୋତ୍ରିୟ-ବ୍ରାହ୍ମଣ ବସାଇସୁସ୍ୱାଦୁ ଅନ୍ନ ଭୋଗ ଦେଇ

Couplet 130

ବିପ୍ରକୁ ଦେଇ ଆଚମନନିବେଦି ସୁମୁଖବାସନ

Couplet 131

ଅତିଥି ଅନ୍ଧ ରଙ୍କୀ ଦୁଃଖୀତାଙ୍କୁ ଭୋଜନେ କରି ସୁଖୀ

Couplet 132

ତାହାଙ୍କୁ ଅନ୍ନଦାନ ଦେଇସନ୍ତୋଷ ଚିତ୍ତେ ଆଜ୍ଞା ପାଇ

Couplet 133

ଅନ୍ନ ଭୁଞ୍ଜିବ ସାୟଂକାଳେବାଳକ ପାଞ୍ଚ ସାତ ମେଳେ

Couplet 134

ରାତ୍ରେ ବଞ୍ଚିବ ବିଷ୍ଣୁଗୀତେସଂଯତ-ବ୍ରହ୍ମଚାରୀ-ବ୍ରତେ

Couplet 135

ରାତ୍ର ଅନ୍ତରେ ପ୍ରାତଃକାଳେସ୍ନାନ କରିବ ଶୁଦ୍ଧଜଳେ

Couplet 136

ଯଥାର୍ଥ ବିଧି ସମଚିତ୍ତେସୁଗନ୍ଧଜଳ ଦୁଗ୍ଧଯୁତେ

Couplet 137

ସ୍ନାନ କରାଇ ଦେବମୂର୍ତ୍ତିପୟ-ଭକ୍ଷଣେ ପୟୋବ୍ରତୀ

Couplet 138

ପୂର୍ବର ପ୍ରାୟ ହୋମକରିବିପ୍ରମାନଙ୍କୁ ଭୋଜ୍ୟେ ବରି

Couplet 139

ଦ୍ୱାଦଶ ଦିନ ଏହିମତେବଞ୍ଚିବ ଶୁଚି ପୟୋବ୍ରତେ

Couplet 140

ଏମନ୍ତ ହରି-ଆରାଧନେହୋମାଦି ବ୍ରାହ୍ମଣ ଭୋଜନେ

Couplet 141

ପ୍ରତୀପଦିନୁ ଏ ଅଭ୍ୟାସିଯାବତ-ଶୁକ୍ଳ-ତ୍ରୟୋଦଶୀ

Couplet 142

ତ୍ରିକାଳେ କରିବ ସ୍ନାହାନରଜନୀ ଧରଣୀ ଶୟନ

Couplet 143

ଅସାଧୁ-ଆଳାପ ତେଜିବନିନ୍ଦିତଭୋଗ ନ କରିବ

Couplet 144

ହିଂସା ତେଜିବ ସର୍ବଭୂତେବିଷ୍ଣୁ-ଆଶ୍ରୟ କରି ନିତ୍ୟେ

Couplet 145

ଏମନ୍ତେ ତ୍ରୟୋଦଶୀ ଦିନବିଷ୍ଣୁଙ୍କୁ କରାଇ ସ୍ନାହାନ

Couplet 146

ଶାସ୍ତ୍ର-ପ୍ରମାଣେ ପଞ୍ଚାମୃତେକରିବ ବେଦବିଧି-ମତେ

Couplet 147

ପୂଜା କରିବ ଶୁଦ୍ଧଚିତ୍ତେସମ୍ଭାର ଶକ୍ତି-ଅନୁମତେ

Couplet 148

ଶ୍ରୀହରି ରୂପ ଧ୍ୟାନେ ଧରିଅନଳେ ମନ୍ତ୍ରେ ହୋମ କରି

Couplet 149

ପାୟସ ଚରୁ ପଞ୍ଚାମୃତେମନ୍ତ୍ର ଉଚ୍ଚାରି ଶୁଦ୍ଧଚିତ୍ତେ

Couplet 150

ନାନା ପ୍ରକାରେ ନଇବେଦ୍ୟକଟୁ ମଧୁର ଆଦି ସ୍ୱାଦ

Couplet 151

ନିବେଦି ବିଷ୍ଣୁ-ପ୍ରୀତିଅର୍ଥେପୂଜା କରିବ ନାନାମତେ

Couplet 152

ଅଗ୍ନିପୂଜନ କର୍ମ ସାରିଗୁରୁ-ଆଚାର୍ଯ୍ୟ ପାଦ ଧରି

Couplet 153

ଧନ-ବସନ-ଅଳଙ୍କାରଯେବା ଦକ୍ଷିଣା ବ୍ରତସାର

Couplet 154

ଋତ୍ୱିଜଜନ ମନ ତୋଷିଦୁଃଖୀ-ଦରିଦ୍ରଙ୍କୁ ଆଶ୍ୱାସି

Couplet 155

ଭୋଜନେ ତୋଷି ସର୍ବପ୍ରାଣୀଯେଣେ ସନ୍ତୋଷ ଚକ୍ରପାଣି

Couplet 156

ସକଳ ଜ୍ଞାତି-ବନ୍ଧୁମେଳେଭୋଜନ ସାରି ସାୟଂକାଳେ

Couplet 157

ସୁବାଦ୍ୟ-ନୃତ୍ୟ-ଗୀତସ୍ୱରେଉତ୍ସବ କରିବ ମନ୍ଦିରେ

Couplet 158

ଏମନ୍ତେ ପୟୋବ୍ରତ କରିଯେବା ଜଗତେ ନରନାରୀ

Couplet 159

ମନୋବାଞ୍ଛିତ ସେ ଲଭନ୍ତିଅନ୍ତେ ବିଷ୍ଣୁମାୟା ତରନ୍ତି

Couplet 160

ଏ ବ୍ରତ ବ୍ରହ୍ମାମୁଖୁଁ ପୂର୍ବେମୁହିଁ ଯେ ଶୁଣିଛି ପ୍ରସ୍ତାବେ

Couplet 161

ତୁ ଯେଣୁ ମୋହର ଭାବିନୀତେଣୁ କହିଲି ଭାବଘେନି

Couplet 162

ଏହା ତୁ ଶୁଦ୍ଧଚିତ୍ତେ ଧରଏ ବ୍ରତ ସର୍ବ ଯଜ୍ଞସାର

Couplet 163

ହରି-ସନ୍ତୋଷେ ବ୍ରତ କରଦୁଗର୍ମ-ସଙ୍କଟୁ ଉଦ୍ଧର

Couplet 164

ସର୍ବଭୂତଙ୍କ ପୂଜା ଏହିଦାନ-ଯଜ୍ଞାଦି ଯେତେ ଧ୍ୟାୟି

Couplet 165

ଏ ବ୍ରତେ ଈଶ୍ୱର-ଅର୍ପଣଚତୁରବର୍ଗର କାରଣ

Couplet 166

ଯମ-ନିୟମ ଏଣେ ସାଧିଏ ଧର୍ମେ ବିଷ୍ଣୁଙ୍କୁ ସମ୍ପାଦି

Couplet 167

ତୁ ଏହା ଏକମନେ ଧରହରି-ସନ୍ତୋଷେ ବ୍ରତ କର

Couplet 168

ତୋର ବାଞ୍ଛିତ ହରି ଦେବେଦେବଙ୍କୁ ନିଶ୍ଚିନ୍ତେ ରଖିବେ

Couplet 169

କହଇ ଦାସ ଜଗନ୍ନାଥଅଦିତି ଶୁଣି ପୟୋବ୍ରତ

Couplet 170

ଚିତ୍ତେ ଚିନ୍ତିଲା ଭଗବାନସୁଜନେ ଏଣେ କର ଧ୍ୟାନ