Adhyaya 9

Couplet 1

ବ୍ରହ୍ମାଦି ଯେତେ ଦେବଗଣେନୃସିଂହ ମୂରତି ଦର୍ଶନେ

Couplet 2

କାତରେ ନାନା ସ୍ତୁତି କଲେସମୀପେ ରହି ନପାରିଲେ

Couplet 3

ଲକ୍ଷ୍ମୀ ଅଣାଇ ଦେବଗଣେବିଶ୍ୱାସେ ମିଳିଲେ ଚରଣେ

Couplet 4

ବୋଇଲେ ଯାଅ ଜନମାତଶାନ୍ତି କରାଅ ତୋର କାନ୍ତ

Couplet 5

ଦେବଙ୍କ ବଚନେ କମଳାଭାବେ କେତେହେଁ ଦୂର ଗଲା

Couplet 6

ଅଦୃଷ୍ଟପୂର୍ବ ରୂପ ଚାହିଁସନ୍ନିଧେ ନ ପାରିଲେ ଯାଇ

Couplet 7

ନିକଟେ ପ୍ରହଲ୍ଲାଦ ଆଣିବିଶ୍ୱାସେ କହେ କୁଶପାଣି

Couplet 8

ନୃସିଂହ ପାଶେ ବେଗେ ଯାଇସ୍ତୁତିରେ ତୋଷ କର ତୁହି

Couplet 9

ଭୟେ ନ ପାରୁ ଆମ୍ଭେ ଯାଇତକ୍ଷଣେ ବ୍ରହ୍ମା ଆଜ୍ଞା ପାଇ

Couplet 10

ନୃସିଂହ ନିକଟେ ମିଳିଲାକରଅଞ୍ଜଳି ଶିରେ ଦେଲା

Couplet 11

ଚରଣତଳେ ଶିର ଦେଇନମିଲା ଦଣ୍ଡବତ ହୋଇ

Couplet 12

ଦେଖି ନୃସିଂହ ଦୟାଚିତ୍ତେଆନନ୍ଦେ ଧରି ତାକୁ ହସ୍ତେ

Couplet 13

ଭୂମିରୁ ତୋଳି ବସାଇଲେହସ୍ତପଙ୍କଜ ଶିରେ ଦେଲେ

Couplet 14

ସେ ପଦ୍ମକରର ମହିମାକି ଦେବା ତହିଁକି ଉପମା

Couplet 15

କାଳଭୁଜଙ୍ଗ ଭୟ ପାଇଯେ ପ୍ରାଣୀ ଶରଣ ପଶଇ

Couplet 16

ସେ ପଦ୍ମକର ରଖେ ତାରେବେଗେ ପଶଇ ସୁଖଘରେ

Couplet 17

ନୃସିଂହ କର ଲାଗି ଶିରେଅଶୁଭ ଗଲା ଅତି ଦୂରେ

Couplet 18

ତକ୍ଷଣେ ଜ୍ଞାନ ପ୍ରକାଶିଲାଆନନ୍ଦେ ଅସୁରର ବଳା

Couplet 19

ନୃସିଂହ-ଚରଣ-କମଳେମନ ନିରୋପିଲା ନିଶ୍ଚଳେ

Couplet 20

ରୋମ ପୁଲକ ତାର ଦେହେଆନନ୍ଦେ ଅଶ୍ରୁ ଜଳ ବହେ

Couplet 21

ଏକାଗ୍ରେ ମନ ଦୃଢ଼ କରିସେ ରୂପ ଅନ୍ତର୍ଗତେ ଭରି

Couplet 22

ଚରଣେ ଦେଇ ବେନିପାଣିକଣ୍ଠ ଗଦ୍‌ଗଦେ କହେ ବାଣୀ

Couplet 23

ବ୍ରହ୍ମାଦି ଦେବଙ୍କ ବିଷୟେଯେଣେ ନୃସିଂହ ଦୟାବହେ

Couplet 24

ଆତ୍ମାର ନିସ୍ତାରଣ ଅର୍ଥେସଂସାରୁ ତରିବା ନିମନ୍ତେ

Couplet 25

ତ୍ରିଚତ୍ୱାରିଂଶ ପଦ ଶ୍ଳୋକେସ୍ତୁତି କରଇ ଏକେ ଏକେ

Couplet 26

ବ୍ରହ୍ମାଦି ସିଦ୍ଧ ମୁନିଗଣେସ୍ୱଭାବ ସାତ୍ତ୍ୱିକ ଲକ୍ଷଣେ

Couplet 27

ଅମୃତ-ବଚନ-ପ୍ରବାହେନିର୍ମଳ-ବିଶୁଦ୍ଧ-ହୃଦୟେ

Couplet 28

ନାନା ପ୍ରକାରେ ସ୍ତୁତି କରିଆରାଧି ନପାରିଲେ ହରି

Couplet 29

ମୁଁ ଛାର ଅସୁର ହୋଇଣକାହୁଁ ତୋଷିବି ନାରାୟଣ

Couplet 30

ଧନ ସତ୍‌କୁଳ ଅବା ରୂପପଣ୍ଡିତପଣ ତେଜ ତପ

Couplet 31

ବଳ ପୌରୁଷ ବୁଦ୍ଧି ଯୋଗଓଜ ବିଭୂତି ବାରମାର୍ଗ

Couplet 32

ଏ ଆଦି ଯେତେ ଗୁଣଗ୍ରାମନୁହଁନ୍ତି ବିଷ୍ଣୁତୋଷେ କ୍ଷମ

Couplet 33

କେବଳ ଭକ୍ତିଯୋଗେ ତୋଷଯେସନେ ଗଜେନ୍ଦ୍ର-ବିଶ୍ୱାସ

Couplet 34

ଦ୍ୱାଦଶଗୁଣେ ବିପ୍ର ଯୁକ୍ତସେ ଯେବେ ନୋହେ ବିଷ୍ଣୁଭକ୍ତ

Couplet 35

ସେ ବିପ୍ରଶ୍ରେଷ୍ଠ ନ ବୋଲାଇସଂସାରୁ ତରିବ ସେ କାହିଁ

Couplet 36

ଯେହୁ ଦ୍ୱାଦଶଗୁଣ ଧରେସେ ବିପ୍ର ସଂସାର-ବେଭାରେ

Couplet 37

ସ୍ୱଭାବେ ସତ୍ୟ ଶମ ଦମଅହିଂସା ତପ କ୍ଷମା ଧର୍ମ

Couplet 38

ଆର୍ଜବ ଦାନ ବ୍ରତ ଧୃତିଶଉଚ ଶ୍ରୁତ ଆଦି କୃତି

Couplet 39

ଦ୍ୱାଦଶ ବ୍ରାହ୍ମଣ ଲକ୍ଷଣବେଦେ ବର୍ଣ୍ଣିତ ଏତେ ଗୁଣ

Couplet 40

ଏମନ୍ତ ବିପ୍ର ହୋଇ ଯେବେଭକ୍ତି ନକରେ କୃଷ୍ଣଭାବେ

Couplet 41

ଚଣ୍ଡାଳ ଜନ୍ମ ହୋଇ ଯେବେମନ ଅର୍ପଇ କୃଷ୍ଣଭାବେ

Couplet 42

ଆତ୍ମା ପବିତ୍ର ବେଗେ କରେଚଣ୍ଡାଳ କୁଳକୁ ଉଦ୍ଧରେ

Couplet 43

ବ୍ରାହ୍ମଣ ସର୍ବମାନ୍ୟ ହୋଇଆତ୍ମା ଉଦ୍ଧରି ନ ପାରଇ

Couplet 44

ଯେ ହରି ନିତ୍ୟ ଶୁଦ୍ଧଜ୍ଞାନଆତ୍ମା ପ୍ରକାଶେ ନିରଞ୍ଜନ

Couplet 45

ସେ କାହିଁ ଅଜ୍ଞାନ-ସଙ୍କଳ୍ପେଆବର ନାନା ପୂଜା ରୂପେ

Couplet 46

ଯେଣୁ ଦୟାଳୁ ସେ ବୋଲାଇଏଣୁ ଭରସା ପ୍ରାଣୀ ପାଇ

Couplet 47

କରନ୍ତି ପୂଜାବିଧି ଯେତେଆତ୍ମା ମଙ୍ଗଳପ୍ରାପ୍ତି ଅର୍ଥେ

Couplet 48

ସ୍ୱଭାବେ ନିଜ ମୁଖ ବେଶଯେସନେ ଦର୍ପଣେ ପ୍ରକାଶ

Couplet 49

ତେଣୁ ଭରସା ପାଇ ମୁହିଁଈଶ୍ୱର-ମହିମା ବର୍ଣ୍ଣଇ

Couplet 50

ଯଦ୍ୟପି ନୀଚ ଦେହ ମୋରସ୍ତବନେ ନାହିଁ ଅଧିକାର

Couplet 51

ତଥାପି ବୁଦ୍ଧି ଯେତେ ମୋରସ୍ତୁତି କରିବି ତୋ ଛାମୁର

Couplet 52

ଅବିଦ୍ୟାବଳେ ଏ ସଂସାରେଏ ଜୀବ ଅଶେଷ ପ୍ରକାରେ

Couplet 53

କର୍ମର ବଳେ ସଞ୍ଚରଇତୋର ଭଜନେ ସେ ତରଇ

Couplet 54

ତୁ ସତ୍ୟଧାମ ଦାମୋଦରମୁହିଁ ଯେ ତୋହର କିଙ୍କର

Couplet 55

ବ୍ରହ୍ମାଦି ଯେତେ ଦେବଗଣେସେ ସର୍ବେ ତୋହର ଚରଣେ

Couplet 56

ତୋତେ ଚିନ୍ତନ୍ତି ଭୟଚିତ୍ତେପାଦେ ସେବନ୍ତି ଅବିରତେ

Couplet 57

ଏଣୁ ସଂସାର ରକ୍ଷାଅର୍ଥେତୋ ଅବତାର ଏ ଜଗତେ

Couplet 58

ତେଣୁ ତୋ କୋପ ତୁ ସଂହରତୁ ନାଥ ଜଗତ ଈଶ୍ୱର

Couplet 59

ତୁ ଏ ଅସୁର ହତ କଲୁସଂସାର ଭୟ ନିବାରିଲୁ

Couplet 60

ଆନନ୍ଦ ସାଧୁଙ୍କର ମନେସର୍ପ-ବୃଶ୍ଚିକ-ନାଶେ ଯେହ୍ନେ

Couplet 61

ଲୋକେ ଆନନ୍ଦେ ସ୍ଥିରମନେଭଜିଲେ ତୋହର ପ୍ରସନ୍ନେ

Couplet 62

ଶୁଣ ହେ ପ୍ରଭୁ ଚକ୍ରଧରଏରୂପ ମହାଭୟଙ୍କର

Couplet 63

ଏବେ ଏ ଭୟରୂପ ହରଲୋକଙ୍କ ଭୟକୁ ସଂହର

Couplet 64

ଜିହ୍ୱା ଚଞ୍ଚଳ ସୌଦାମିନୀପ୍ରଳୟାନଳ ନେତ୍ର ବେନି

Couplet 65

ଭ୍ରୂକୁଟୀ କୁଟୀଳ ପ୍ରଚଣ୍ଡଦଂଷ୍ଟ୍ରା କରାଳ ପାଟିତୁଣ୍ଡ

Couplet 66

ଅସୁର-ହୃଦୟ-ରୁଧିରେତା ଅନ୍ତ୍ର-ପୁଷ୍ପମାଳ କରେ

Couplet 67

କେଶର ଦିଶେ ଶୋଣି ବର୍ଣ୍ଣରୁଧିରେ ରଙ୍ଗ ବେନି କର୍ଣ୍ଣ

Couplet 68

ତୁମ୍ଭର ଘୋରନାଦ ଶୁଣିପ୍ରଳୟ-ବଜ୍ର ପ୍ରାୟ ମଣି

Couplet 69

ଅଇରାବତ ଆଦି ନାଗେପଳାଇଗଲେ ଅଷ୍ଟଦିଗେ

Couplet 70

ଅନଳ ପ୍ରାୟ ନଖପନ୍ତିଅସୁର ରୁଧିର ପିବନ୍ତି

Couplet 71

ଏମନ୍ତ ରୂପ ତୋର ଚାହିଁଭୋ ନାଥ ମୋର ଭୟ ନାହିଁ

Couplet 72

ତୁ ନାଥ ଶରଣ-ବତ୍ସଳଅବ୍ୟୟ ଆତ୍ମା ଆଦିମୂଳ

Couplet 73

ତୋର ସଂସାରଚକ୍ରେ ପଡ଼ିଆତ୍ମାର ନିଜ ପଥ ହୁଡ଼ି

Couplet 74

ସେ ମାୟାଚକ୍ର ମୋତେ ଘେନିକାଳେ ଭ୍ରମାଇ ନାନା ଯୋନି

Couplet 75

ସ୍ୱକର୍ମବଦ୍ଧେ ମୋ ଜୀବନଏଣୁ ହରାଇ ନିଜ ଜ୍ଞାନ

Couplet 76

ଏବେ ତୋହର ପାଦମୂଳେଶରଣ ପଶିଲି ନିଶ୍ଚଳେ

Couplet 77

ତୋତେ ନଭଜି ନାରାୟଣମୋର ଜୀବନ ଗତି ଶୁଣ

Couplet 78

ଏ ଘୋର ସଂସାର-ସାଗରେଜନ୍ମ-ମରଣ ଅଭ୍ୟନ୍ତରେ

Couplet 79

ସଂଯୋଗ-ବିଯୋଗ ଅଜ୍ଞାନଶୋକ-ଅନଳେ ଦହେ ମନ

Couplet 80

ଏ ଦେହେ ସର୍ବ ଦୁଃଖ ବ୍ୟାଧିତୋହର ଚରଣ ଔଷଧି

Couplet 81

ସେ ପାଦ ଛାଡ଼ି ମୁହିଁ ଦୂରେଭ୍ରମଇଁ ଘୋର ଅନ୍ଧକାରେ

Couplet 82

ଏବେ ଏମନ୍ତ ଆଜ୍ଞା କରଯେମନ୍ତେ ସେବିବି ପୟର

Couplet 83

ତୁ ନାଥ ପ୍ରାଣୀଙ୍କ ଜୀବନପ୍ରିୟ-ଦେବତା ବନ୍ଧୁଜନ

Couplet 84

ତୋହର ଲୀଳା-କ୍ରୀଡ଼ା ବାଣୀବିରଞ୍ଚି ସଭାମଧ୍ୟେ ଭଣି

Couplet 85

ମୁଁ ତୋର ଲୀଳାଗୁଣ ଗୁଣିତରିବି ଭବ-ତରଙ୍ଗିଣୀ

Couplet 86

ତୋ ପାଦ-ପଦ୍ମବନ ମଧ୍ୟେଯେ ହଂସ ଖେଳନ୍ତି ଆନନ୍ଦେ

Couplet 87

ତାହାଙ୍କ ସଙ୍ଗୀ ମୋତେ କରଏ ମାୟା-ସଂସାରୁ ଉଦ୍ଧର

Couplet 88

ବାଳକ ରକ୍ଷଣ ସଂସାରେପିତାମାତା ହୁଁ ନାହିଁ ପରେ

Couplet 89

ଅଗାଧ-ସମୁଦ୍ର ଲଙ୍ଘନେପ୍ରାଣୀଙ୍କ ନଉକା ଯେସନେ

Couplet 90

ପଥେ-ତୃଷିତ-ପ୍ରାଣୀ ଯେହ୍ନେଜୀବନ ରଖେ ଜଳପାନେ

Couplet 91

ବ୍ୟାଧିରେ ଆର୍ତ୍ତ ହେଲେ ଜନଔଷଧି ହୁଅଇ ଶରଣ

Couplet 92

ମାତ୍ର ତୋ ପାଦ କୃପା ବିନେଏ କେହି ନୁହଁନ୍ତି କାରଣେ

Couplet 93

ଏମନ୍ତ ତୋ ପଦ୍ମଚରଣଏଣୁ ମୁଁ ପଶିଲି ଶରଣ

Couplet 94

ଭୋ ନାଥ ତୋର ମାୟାବଳେପ୍ରକୃତି ଏ ମାୟା ଶୟଳେ

Couplet 95

କାଳର ବଳେ ସଙ୍ଗ ହୋଇଯାହାକୁ ଯେମନ୍ତ ଭାବଇ

Couplet 96

ଯେଣେ ଯାହାକୁ ନିଯୋଜଇସେ ଫଳ ତାର ହସ୍ତେ ଦେଇ

Couplet 97

କାହୁଁ ଆସଇ କାହିଁ ଥାଇକାହାକୁ କାହିଁ ନେଇ ଥୋଇ

Couplet 98

ଜୀବକୁ କରେ ନାନା ଗତିଏମନ୍ତେ ପ୍ରଧାନ ପ୍ରକୃତି

Couplet 99

ସେ ଜୀବ ତୋର ସଙ୍ଗେ ରହେଭାବେ ଭ୍ରମଇଁ ସର୍ବଦେହେ

Couplet 100

ଏ ଜୀବ ତୋର ଅଂଶୁ ଜାତତୋହର ବଶ ଏ ଜଗତ

Couplet 101

କାଳର ବଳେ ବଶ ହୋଇଦେହ-ବନ୍ଧନେ ବଦ୍ଧ ଦେହୀ

Couplet 102

ସଂସାରଚକ୍ରେ ଷୋଡ଼ଶାରେକର୍ମେ ଭ୍ରମଇ ନିରନ୍ତରେ

Couplet 103

ଦଶଇନ୍ଦ୍ରିୟ ମନବନ୍ଧେଶବ୍ଦ ସ୍ପରଶ ରୂପ ଗନ୍ଧେ

Couplet 104

ରସେ ରସଇ ସର୍ବକାଳେଏମନ୍ତେ ଭ୍ରମେ ମହୀତଳେ

Couplet 105

ଏମନ୍ତ ଚକ୍ରେ ଜୀବ ବସିକର୍ମ-ବିଷୟ ରସେ ରସି

Couplet 106

ଚକ୍ରେ ଭ୍ରମଇ ଦୁଃଖ ସହିତୋ ବିନୁ ତାର ମୋକ୍ଷ ନାହିଁ

Couplet 107

ନିତ୍ୟ ବିଜିତ ଆତ୍ମାଗୁଣସ୍ୱତେଜ ବଳେ ନାରାୟଣ

Couplet 108

ଏ କାଳଆତ୍ମା ବଶ କରିବିସର୍ଗ-ଶକ୍ତିକି ବିସ୍ତାରି

Couplet 109

ସେ ସୃଷ୍ଟି କାଳଚକ୍ରେ ଥୋଇସେ ଚକ୍ରେ ଜୀବକୁ ବସାଇ

Couplet 110

ପେଡ଼ଇ ଈକ୍ଷୁଦଣ୍ଡ ପ୍ରାୟେଏଣୁ ଡରଇ ମୋର କାୟେ

Couplet 111

ଏବେ ମୁଁ ତୋ ଶରଣାଗତଚକ୍ରୁ ଉଦ୍ଧର ମୋର ନାଥ

Couplet 112

ମୁଁ ଏବେ ଦେଖିଲି ପ୍ରତ୍ୟକ୍ଷେଭୋ ନାଥ ତୋହର ସମକ୍ଷେ

Couplet 113

ବ୍ରହ୍ମାଣ୍ଡ ମଧ୍ୟେ ଯେତେ ଦେବାମନୁଷ୍ୟ କରେ ତାଙ୍କୁ ସେବା

Couplet 114

ଇଚ୍ଛନ୍ତି ଅଇଶ୍ୱର୍ଯ୍ୟ ଭୋଗସାତ୍ତ୍ୱିକ ସଂଯୋଗ ବିଯୋଗ

Couplet 115

ଏ ଦେବେ ମୋର ପିତା ତ୍ରାସେଦଣ୍ଡେ ନଥାନ୍ତି ଅବକାଶେ

Couplet 116

ତାହାର ଭ୍ରୂକୁଟୀ କୁଟୀଳେଭୟେ ପଶନ୍ତି ଅନ୍ତରାଳେ

Couplet 117

ତୁ ଏବେ ତାହାକୁ ସଂହାରିରଖିଲୁ ସର୍ବଦେବ ଶିରୀ

Couplet 118

ତେଣୁ ଯେ ପ୍ରାଣୀଙ୍କ ଆଶିଷଯେ ଫଳ ଏ ଭୂତ ଭବିଷ୍ୟ

Couplet 119

ଆୟୁ ସମ୍ପଦ ଭୋଗ ଅର୍ଥଇନ୍ଦ୍ରିୟ ସୁଖର ପ୍ରାପତ

Couplet 120

ସେ ସର୍ବବାଞ୍ଛା ତୋର ବଳେକାଳ ହରଇ ଅବହେଳେ

Couplet 121

ତେଣେ ମୋହର କାର୍ଯ୍ୟ ନାହିଁତୋ ପାଦେ ରଖ ଭାବଗ୍ରାହୀ

Couplet 122

ତୋ ମାୟା-ସଂସାର-ସାଗରେସ୍ୱପ୍ନ ମୃଗତୃଷ୍ଣା ପ୍ରକାରେ

Couplet 123

ଏ କଳେବରର ମହିମାଅଶେଷ ରୋଗଙ୍କର ସୀମା

Couplet 124

ଏ ସର୍ବ ଶ୍ରୁତିମୁଖେ ଶୁଣିସ୍ୱପ୍ନର ପ୍ରାୟେ ପରିମାଣି

Couplet 125

ଅଛଇ ତୋର ମାୟାମୋହେକେବେ ହେଁ ବିରକତ ନୋହେ

Couplet 126

କାମଅନଳ ମଧୁ ଲୋଭେକେମନ୍ତେ ଲିଭିବ ସ୍ୱଭାବେ

Couplet 127

ମୋହର ଜନ୍ମ ରଜଗୁଣେଅଧିକ ତାମସ ଲକ୍ଷଣେ

Couplet 128

ଅସୁରକୁଳେ ଜାତ ମୁହିଁତୋ ଅନୁକମ୍ପା ଅବା କାହିଁ

Couplet 129

ଭୋ ନାଥ ମୋର ଶିରେ ଆଣିପ୍ରସନ୍ନେ ଦେଲୁ ପଦ୍ମପାଣି

Couplet 130

ତୋର ପ୍ରସାଦ ପଦ୍ମନାଭବ୍ରହ୍ମା ଶଙ୍କରରେ ଦୁର୍ଲ୍ଲଭ

Couplet 131

କମଳା ତୋର ହୃଦେ ଥାଇତୋ ଭାବ ଲଭି ନପାରଇ

Couplet 132

ତୋର ମହିମା ଭାବଗ୍ରାହୀପର-ଅପର ତୋର ନାହିଁ

Couplet 133

ଏ ଜୀବ ପରାପର ଜାଣେସଂସାରଗତି ନ ପ୍ରମାଣେ

Couplet 134

ଉତ୍ତମ ସେବା ତୋ ଚରଣେଯେ ପ୍ରାଣୀ କରେ ଅନୁକ୍ଷଣେ

Couplet 135

ସେ ପାଦ ଯାରେ ଦୟା କରେପ୍ରସନ୍ନ କଳ୍ପଦ୍ରୁମ ତାରେ

Couplet 136

ସେବାନୁରୂପ ଫଳ ପାଇପର-ଅପର ତୋର ନାହିଁ

Couplet 137

ଏମନ୍ତେ ଭବବନ୍ଧ-କୂପେବେଢ଼ି ଅଛନ୍ତି କାଳସର୍ପେ

Couplet 138

ସେ କୂପେ ପଡ଼ି ସର୍ବଜନେକାମ କଳ୍ପନ୍ତି ନିତ୍ୟ ମନେ

Couplet 139

ତାହାଙ୍କ ସଙ୍ଗତରେ ଥାଇସେ କାମ କଳ୍ପୁଥାଇ ମୁହିଁ

Couplet 140

ନାରଦ ମୁନି ବେଦମୟସେ ମୋତେ କଲେ ଅନୁଗ୍ରହ

Couplet 141

ଏଣୁ ସାଧୁଙ୍କ ସଙ୍ଗେ ଭାବିତୋ ସେବା କେମନ୍ତେ ଛାଡ଼ିବି

Couplet 142

ଅନନ୍ତ ମୋ ପ୍ରାଣ ରକ୍ଷଣପିଅର ମରଣ କାରଣ

Couplet 143

ଭକ୍ତ-ରକ୍ଷଣ ବାକ୍ୟମତେତୋ ଅବତାର ଏ ଜଗତେ

Couplet 144

ମୋ ପିତା ଖଡ଼୍‌ଗ ଧରି ହସ୍ତେପ୍ରତିଜ୍ଞା କଲା ମୋ ଅଗ୍ରତେ

Couplet 145

ବୋଇଲା ଦେଖା ତୋ ଠାକୁରନୋହିଲେ ଛେଦିବଇଁ ଶିର

Couplet 146

ମୁହିଁ ଈଶ୍ୱର ତିନିପୁରେମୋ ତହୁଁ କେବା ଅଛି ପରେ

Couplet 147

ଏଣୁ ମୋ ବାକ୍ୟ ସତ୍ୟ କରିତୋ ଅବତାର ନରହରି

Couplet 148

ତୁ ଏ ଜଗତେ ଦେହ ଧରିଜନଙ୍କ ମଧ୍ୟେ ଅବତରି

Couplet 149

ପ୍ରକାଶୁ ସ୍ଥୂଳ ସୂକ୍ଷ୍ମ ରୂପେଏବେ ରହୁ ନିର୍ଲେପ ରୂପେ

Couplet 150

ତ୍ରିଗୁଣ ସର୍ଜୁ ଗୁଣମୟେମାୟା ପ୍ରକାଶୁ ନାନାଦେହେ

Couplet 151

ବିହରୁ ଗୁଣମଧ୍ୟେ ପଶିକେ କହୁ ତୋ ରୂପ ବିଶେଷି

Couplet 152

ସତ ଅସତ ଏ ଜଗତତୋ ତହୁଁ ନାହିଁ ଭିନ୍ନମତ

Couplet 153

ମାୟାରେ ଆତ୍ମ ପର କରେବିଅର୍ଥେ ବୁଦ୍ଧିରେ ବିଚାରେ

Couplet 154

ପ୍ରକାଶ ସ୍ଥିତି ଅନ୍ତ ସୃଷ୍ଟିତରୁ-ପଲ୍ଲବେ ଯେହ୍ନେ ଅଷ୍ଟି

Couplet 155

ତୁ ଏ ଜଗତେ ଆତ୍ମବଳେଆତ୍ମାରେ ଥାଉ ଅନ୍ତଃକାଳେ

Couplet 156

ସୃଷ୍ଟି ସଂହାରି ମାୟାବଳେନାଗ ଶୟନେ ତୁ ନିଶ୍ଚଳେ

Couplet 157

ତୋ ନିଜ ସୁଖେ ଅନୁଭବନିରୀହ ରୂପ ପଦ୍ମନାଭ

Couplet 158

ମୁଦ୍ରିତ ଲୋଚନେ ମୁରାରିନିଦ୍ରାକୁ ହୃଦରେ ସଂହାରି

Couplet 159

ତୁରୀୟେ ସୁଖେ ରହୁ ତୁହିତ୍ରିଗୁଣେ ତୋର କାର୍ଯ୍ୟ ନାହିଁ

Couplet 160

ସେ ଗୁଣମୟ ତୋ ଶରୀରେଚେତଇ ନିଦ୍ରା ଅଭ୍ୟନ୍ତରେ

Couplet 161

କାଳର ବଳେ ତୋ ନୟନେଯୋଗ ସମାଧି ଅବସାନେ

Couplet 162

ତୋ ନାଭିମଧ୍ୟେ ଜଳକଣେବୀଜ ପ୍ରକାଶେ ତତକ୍ଷଣେ

Couplet 163

ବୀଜୁ ଯେସନେ ବଟ ହୋଇପଦ୍ମ ମୃଣାଳ ପ୍ରକାଶଇ

Couplet 164

ସେ ପଦ୍ମମଧ୍ୟୁ ବ୍ରହ୍ମା ଜାତନ ଜାଣେ ଆତ୍ମାର ବୃତ୍ତାନ୍ତ

Couplet 165

ତୁ ବୀଜଆତ୍ମା ତା ଶରୀରେପ୍ରକାଶୁ ବାହ୍ୟ ଅଭ୍ୟନ୍ତରେ

Couplet 166

ତାହା ନଜାଣି ବେଦମୁଖଆରତେ ଖୋଜିଲେ ଅନେକ

Couplet 167

କାହୁଁ ଅଇଲି ବୋଲି ଚିନ୍ତିଭୟେ ଭାଳଇ ପ୍ରଜାପତି

Couplet 168

ପୁଣି ପଶିଲା ପଦ୍ମନାଳେଶତେବରଷ ଯୋଗବଳେ

Couplet 169

ଅଙ୍କୁରମାର୍ଗେ ବୀଜ ଲୋଡ଼ିଭ୍ରମିଲା ବହୁ ଦୁଃଖେପଡ଼ି

Couplet 170

ଲୋଡ଼ି ନ ପାଇ ମହାଜଳେପୁଣି ଉଠିଲା ପଦ୍ମନାଳେ

Couplet 171

ଭାଳଇ ପଦ୍ମମଧ୍ୟେ ରହିତୋ ଅନ୍ତ ପାଇବ ସେ କାହିଁ

Couplet 172

ତୋତେ ନପାଇ ପ୍ରଜାପତିତପସାଧନେ କଲା ମତି

Couplet 173

ଅନେକ କାଳ ସାଧି ତପଦେଖିବା ନିମନ୍ତେ ତୋ ରୂପ

Couplet 174

ତୋ ରୂପ କରି ଅନୁମାନେଭୂମିରୁ ଗନ୍ଧମାତ୍ରା ଯେହ୍ନେ

Couplet 175

ସହସ୍ର-ବଦନ-ନୟନସହସ୍ର-ଶିର-ନାସା-କର୍ଣ୍ଣ

Couplet 176

ସହସ୍ର-ଉର ସସ୍ରପାଦସହସ୍ର ଭୁଜେ ସସ୍ରାୟୁଧ

Couplet 177

ସେ ମାୟାମୟ ରୂପ ସୁଖେବିଧାତା ଦେଖିଲା ସମ୍ମୁଖେ

Couplet 178

ତୋହର ଦେଖି ଦିବ୍ୟବେଶବିଧାତା ହୋଇଲା ହରଷ

Couplet 179

ବ୍ରହ୍ମାର ଅର୍ଥେ ପଦ୍ମନାଭରୂପ ପ୍ରକାଶ ହୟଗ୍ରୀବ

Couplet 180

ବିଷ୍ଣୁର ଯୋଗନିଦ୍ରା କାଳେକର୍ଣ୍ଣରୁ ମଳ ପଡ଼ି ଜଳେ

Couplet 181

ରଜ-ତାମସ-ଗୁଣେ ଜାତମଧୁ-କୈଟଭ ବେନି ଦୈତ୍ୟ

Couplet 182

ଦେବହେଳନ ମହାଘୋରତେଜ ପ୍ରଚଣ୍ଡ ଭୟଙ୍କର

Couplet 183

ତାହାଙ୍କୁ ମାରି ଶତ୍ରୁଗଣବ୍ରହ୍ମାଙ୍କୁ କଲୁ ସମର୍ପଣ

Couplet 184

ଏହି ପ୍ରକାରେ ନରହରିନୃ ପଶୁ ଋଷି ରୂପ ଧରି

Couplet 185

ଦେବତା ଜଳଜନ୍ତୁ ରୂପେତୋ ଅବତାର ମହାକଳ୍ପେ

Couplet 186

ଦୁଷ୍ଟ ନିବାରି ସନ୍ଥ ପାଳୁତୁ ନାଥ ପରମ ଦୟାଳୁ

Couplet 187

ଯୁଗାନୁଧର୍ମେ ପାଳୁ ନାଥକଳିଲେ ନୋହୁ ତୁ ତେମନ୍ତ

Couplet 188

ଏ ରୂପେ ଛନ୍ନରୂପ ହେଉଏଣୁ ତ୍ରିଯୁଗ ତୁ ବୋଲାଉ

Couplet 189

ନିରତେ ମାୟାଜଡ଼େ ଛନ୍ନପାପ-ସଙ୍କଳ୍ପେ ଦୁଷ୍ଟମନ

Couplet 190

ଏଣୁ ତୋ କଥାମୃତେ ରତିକେ କରିପାରେ ଦୃଢ଼ ମତି

Couplet 191

କାମ-ସଙ୍କଳ୍ପେ ମୁଁ ଆତୁରକାହୁଁ ଜାଣିବି ଗତି ତୋର

Couplet 192

ଏ ଦେହେ ଇନ୍ଦ୍ରିୟଙ୍କ ଗୁଣଭୋ ନାଥ ସାବଧାନେ ଶୁଣ

Couplet 193

ଆତ୍ମା ନରହି ହୃଦଗତେଚଳଇ ଇନ୍ଦ୍ରିୟ ଆୟତ୍ତେ

Couplet 194

ରସ-ଲାଳସେ ଜିହ୍ୱା ଧରେତୃଷିତେ ତୃଷା ବଳ କରେ

Couplet 195

ଉପସ୍ଥ ଧରେ କାମ ଭୋଗେଗୁହ୍ୟ ଧରଇ ମଳୋତ୍ସର୍ଗେ

Couplet 196

ଚର୍ମ ଧରଇ ଶୀତ-ଉଷ୍ମେଉଦର ଧରେ ଭକ୍ଷ-କର୍ମେ

Couplet 197

ଶ୍ରବଣ ଶବ୍ଦ-ଅର୍ଥେ ଧରେଗନ୍ଧାର୍ଥେ ନାସିକା-ବିବରେ

Couplet 198

ରୂପ ସଂଯୋଗେ ଦୃଷ୍ଟି ରହେବଳ-ବିକ୍ରମ ଶକ୍ତି ବହେ

Couplet 199

ଏ ଇନ୍ଦ୍ରିଗଣ କର୍ମବଳେପ୍ରାଣୀ ନାଶନ୍ତି ଅବହେଳେ

Couplet 200

ବହୁତ ସପତଣୀ ଘରେଗୃହସ୍ଥ ରମେ ନିରନ୍ତରେ

Couplet 201

ସେ ଯେହ୍ନେ ପତ୍ନୀଙ୍କ ଆୟତ୍ତେନିରତେ ରମେ ନାନାମତେ

Couplet 202

ସେ ନାରୀଗଣେ ତାର ଚିତ୍ତକରନ୍ତି ଆପଣା ଆୟତ୍ତ

Couplet 203

ଯେ ଯାହାମତେ ସୁଖ ଚିନ୍ତିସ୍ୱାମୀ ଜୀବନ ସେ ହରନ୍ତି

Couplet 204

ଏମନ୍ତେ କର୍ମପାଶ ବଳେବଇତରଣୀ ଭବ ଜଳେ

Couplet 205

ଜନ୍ମ ମରଣ ପ୍ରାଣୀ ବହେଅନ୍ୟୋନ୍ୟ ଘଟଣା-ପ୍ରବାହେ

Couplet 206

ସ୍ୱ-ପରଭେଦେ ପଥ ହୁଡ଼ିଯାତନା ମଧ୍ୟେ ଛନ୍ତି ଜଡ଼ି

Couplet 207

ତାହାଙ୍କ ମଧ୍ୟେ ମୁହିଁ ଥାଇଆତ୍ମାର ଗତି ନ ଜାଣଇ

Couplet 208

ତୋ ପାଦେ ପଶିଲି ଶରଣମୋତେ ଉଦ୍ଧର ନାରାୟଣ

Couplet 209

ଦୁଃଖୀଜନଙ୍କ ଉପକାରେତୋ ସମ ନାହିଁନା ସଂସାରେ

Couplet 210

ସଂସାର ଉତ୍ପତ୍ତି ପାଳନଈଷିତେ କରୁ ସଂହରଣ

Couplet 211

ମୂଢ଼ପ୍ରାଣୀଙ୍କି ତୋର ଦୟାକେ ଜାଣିପାରେ ନାଥ ଏହା

Couplet 212

ଆରତ ଜନବନ୍ଧୁ ହେଉକରୁଣାସିନ୍ଧୁ ନାମ ବହୁ

Couplet 213

ତୋହର ସେବକ ତାରଣେତୁ ନାଥ ଥାଉ ଅନୁକ୍ଷଣେ

Couplet 214

ତୋର ମହିମା-ଗୁଣ ଗୁଣିନିଶ୍ଚଳ ଚିତ୍ତେ ପରିମାଣି

Couplet 215

ଏଣୁ ମୋହର ଭୟ ନାହିଁବଇତରଣୀ ମଧ୍ୟେ ଥାଇ

Couplet 216

ତୋରେ ବିମୁଖ ଯାର ମନସେ ପ୍ରାଣୀ ସେ ଜଳେ ନିମଗ୍ନ

Couplet 217

କୁଟୁମ୍ବ-ଭରଣ ନିମନ୍ତେଭାର ବହଇ ଅବିରତେ

Couplet 218

ଇନ୍ଦ୍ରିୟ ସୁଖେ ଗୃହେ ରହେକୁଟୁମ୍ବ ସ୍ନେହେ ମାୟାମୋହେ

Couplet 219

ଏ ଯେ ସକଳ ମୁନିଜନେନିର୍ମଳ-ନିଶ୍ଚଳ-ଚିନ୍ତନେ

Couplet 220

ମାୟା-କଳ୍ପନା ଦୂର କରିମଉନବ୍ରତେ ବ୍ରହ୍ମଚାରୀ

Couplet 221

ବିଜନେ ରହନ୍ତି ନିରତେଜପନ୍ତି ନିଜ ମୁକ୍ତି ଅର୍ଥେ

Couplet 222

ତାହାଙ୍କ ଚିନ୍ତା କାହିଁ ଏଣେଯେ ବା ଭ୍ରମନ୍ତି ଭବ-ବଣେ

Couplet 223

ଭ୍ରମେ ଭ୍ରମନ୍ତା ପ୍ରାଣୀଙ୍କରତୋ ତହୁଁ ରକ୍ଷକ କେ ଆର

Couplet 224

ଏ ଗୃହେ ମୈଥୁନାଦି ସୁଖେପ୍ରାଣୀ କ୍ରୀଡ଼ନ୍ତି ଦୁଃଖ ଶୋକେ

Couplet 225

କଣ୍ଡୁ ଯେସନେ ନଖମାଝେନିମିଷ ମାତ୍ର ସୁଖ ବୁଝେ

Couplet 226

କଣ୍ଡୁ ଅନ୍ତରେ ମହାଦୁଃଖତେସନେ ଗୃହବନ୍ଧ-ସୁଖ

Couplet 227

ଏଣୁ ନରମେ ଜ୍ଞାନୀଜନତୋ ପାଦପଦ୍ମେ ଦେଇ ମନ

Couplet 228

ମଉନବ୍ରତ ଶ୍ରୁତ ତପସ୍ୱଧର୍ମ ଅଧ୍ୟୟନ ଜପ

Couplet 229

ଏକାନ୍ତ ସର୍ବସେବା-ବିଧିବ୍ୟାଖ୍ୟାନ ନିଶ୍ଚଳ-ସମାଧି

Couplet 230

ଜ୍ଞାନ ଅମୃତ ଗୁରୁବାଣୀସୁଜନେ ବୁଝ ପରିମାଣି

Couplet 231

ଏ ଦଶ ଅପବର୍ଗ ଅର୍ଥେଅଜିତେନ୍ଦ୍ରିୟ ସାଧେ ଯେତେ

Couplet 232

ତାହାଙ୍କ ସୁଖ ଲେଶ ନାହିଁମାୟା-ସଂସାରେ ଭ୍ରମୁଥାଇ

Couplet 233

ତୋର ଚରଣ ଅବିରତଜ୍ଞାନୀଜନଙ୍କ ହୃଦେସ୍ଥିତ

Couplet 234

ତୋତେ ଲଭନ୍ତି ଭାବଗ୍ରାହୀଦାମ୍ଭିକେ ଲଭିବେ ତା କାହିଁ

Couplet 235

ଏ ସୃଷ୍ଟି ମଧ୍ୟେ ପଦ୍ମମୁଖତୁ ନାଥ ହେଉ ସ୍ଥୂଳ ସୂକ୍ଷ୍ମ

Couplet 236

ବୀଜରୁ ଅଙ୍କୁର ଯେମନ୍ତପ୍ରକାଶ କରେ ଏ ଜଗତ

Couplet 237

ସେ ବୀଜ-ଅଙ୍କୁର ତୋ ଦେହତୋର ପ୍ରକାଶ ଏ ଉଭୟ

Couplet 238

ତୋତେ ଯେ ଭଜେ ଅବିରତେତୋ ରୂପ ଜାଣଇ ସେ ଚିତ୍ତେ

Couplet 239

ଭକତି ଯୋଗମାର୍ଗେ ସାଧେଅନଳ ଯେହ୍ନେ ଦାରୁ ମଧ୍ୟେ

Couplet 240

ଗଗନ ସମୀର ଅନଳଅବନୀ ଆଦି ମହାଜଳ

Couplet 241

ମାତ୍ରା-ସ୍ୱରୂପୀ ଇନ୍ଦ୍ରିଗଣଚତୁର ଅନ୍ତର କରଣ

Couplet 242

ତୋ ଅନୁଗ୍ରହେ ଦେହେ ରହିଗୁଣ ବିଗୁଣ ଯେତେ ହୋଇ

Couplet 243

ମନ ବଚନେ ଯେତେ କରିତୁ ସର୍ବରୂପ ନରହରି

Couplet 244

ତ୍ରିଗୁଣ ମହତ୍ ଅହଙ୍କାରମନ ପ୍ରକୃତି ଦେବ ନର

Couplet 245

ଏ ଆଦି ଅନ୍ତ ମଧ୍ୟେ ଥାନ୍ତିକେବେହେଁ ତୋତେ ନ ଜାଣନ୍ତି

Couplet 246

ସେ ଭାବ ଜାଣି ମୁନିଜନେନିଶ୍ଚଳେ ରହନ୍ତି ମଉନେ

Couplet 247

ଭୋ ନାଥ ତୋର ନାମ ସ୍ତୁତିତୋ ପୂଜା କର୍ମେ ଯାର ମତି

Couplet 248

ନିତ୍ୟେ ଚିନ୍ତନ୍ତି ତୋ ଚରଣତୋ ପୁଣ୍ୟ କଥନ ଶ୍ରବଣ

Couplet 249

ସୁପୁଣ୍ୟ କର୍ମ ଅର୍ପି ତୋତେଏ ଷଡ଼ଅଙ୍ଗ ଭକ୍ତିମତେ

Couplet 250

ଯେ ଅବା ସାଧନ୍ତି ଜଗତେସେ ତୋତେ ଲଭନ୍ତି ନିଶ୍ଚିନ୍ତେ

Couplet 251

ଯେବେ ତୋ ଭାବେ ନାହିଁ ମନସେ ତୋର ଭକ୍ତିଭାବୁଁ ହୀନ

Couplet 252

ତୁ ନାଥ ଅନନ୍ତ ମୂରତିପରମଯୋଗୀଙ୍କର ଗତି

Couplet 253

ଯେ ତୋର ଅଭୟଚରଣତହିଁ ମୁଁ ନିଶ୍ଚୟେ ଶରଣ

Couplet 254

ଏମନ୍ତେ ଧର୍ମସୁତ ଆଗେନାରଦ ମୁନି ଅନୁରାଗେ

Couplet 255

କହନ୍ତି ସଭାମଧ୍ୟେ ବସିଶୁଣ ନୃପତି କୁରୁବଂଶୀ

Couplet 256

ଅସୁରସୁତ ବିଷ୍ଣୁ ଆଗେଯେତେ ବର୍ଣ୍ଣିଲା ଭକ୍ତିମାର୍ଗେ

Couplet 257

ଶୁଣି ସନ୍ତୋଷ ନାରାୟଣଯେ ହରି ପରମ କାରଣ

Couplet 258

ସୁପ୍ରୀତେ ତାଙ୍କୁ କୋଳେ ଧରିପ୍ରଚଣ୍ଡ କୋପ ପରିହରି

Couplet 259

କହନ୍ତି ମଧୁର-ବଚନଶୁଣ ହେ ଅସୁରନନ୍ଦନ

Couplet 260

ସନ୍ତୋଷେ ଜାଣିଲି ତୋ ଭାବଏ ନରଲୋକେ ସୁଦୁର୍ଲ୍ଲଭ

Couplet 261

ମୁଁ କାମ ପୂରାଏ ପ୍ରାଣୀରଆତ୍ମାନୁରୂପେ ମାଗ ବର

Couplet 262

ଯେ ପ୍ରୀତି ନ କରଇ ମୋତେମୁଁ ତାକୁ ଦୁର୍ଲ୍ଲଭ ଜଗତେ

Couplet 263

ମୋତେ ଯେ ଦେଖଇ ନୟନତାର କି ତପେ ପ୍ରୟୋଜନ

Couplet 264

ଏ ଘେନି ଜ୍ଞାନୀଜନ ଯେତେଭାବେ ଭଜନ୍ତି ନିତ୍ୟେ ମୋତେ

Couplet 265

ଚିତ୍ତ ପ୍ରସନ୍ନେ ବର ଦେଇସର୍ବ ଆଶିଷ ପତି ମୁହିଁ

Couplet 266

ଏମନ୍ତ ବର-ଲୋଭ କହିମନ ମୋହିଲେ ଭାଗଗ୍ରାହୀ

Couplet 267

ଏକାନ୍ତ ଭକ୍ତି ହୃଦେ ତାରବରେ ନକଲା ଅଙ୍ଗୀକାର

Couplet 268

ଏମନ୍ତ ମହିମା ଯାହାରଦେବମାନବେ ଅଗୋଚର

Couplet 269

ଯେ ଏହା ଆରତେ ଶୁଣନ୍ତିପଢ଼ନ୍ତି ଅବା ନିତିନିତି

Couplet 270

ସେ ସର୍ବେ ସଙ୍କଟୁ ତରନ୍ତିହରିପାଦରେ ଲଭେ ଭକ୍ତି

Couplet 271

ଶୁଣ ସୁଜନେ ଏହୁ ରସହରିବ ଦୁର୍ଗତି ଅଶେଷ

Couplet 272

ସେ ପ୍ରହଲ୍ଲାଦ ପାଦଗତନମଇଁ ବିପ୍ର ଜଗନ୍ନାଥ