Adhyaya 21

Couplet 1

ମୈତ୍ରେୟ ମୁନି ପାଦେ ପଡିବିଦୁର କହେ କରଯୋଡି

Couplet 2

ବୋଇଲେ ଶୁଣ ହେ ମୈତ୍ରେୟମୋହର ପ୍ରତି ତୁ ସଦୟ

Couplet 3

ସେ ସ୍ୱାୟମ୍ଭୂବ-ମନୁବଂଶମୋ ଆଗେ କର ହେ ପ୍ରକାଶ

Couplet 4

ଯାର ପ୍ରଶଂସା ସାଧୁଲୋକକରନ୍ତି ସଦା ଅତିରେକ

Couplet 5

ବ୍ରହ୍ମାର ତହୁଁ ଯାର ତନୁଯେ ପୂର୍ବେ ସ୍ୱାୟମ୍ଭୂବମନୁ

Couplet 6

ତାହାର ବଂଶ ଏ ଜଗତେକି ରୂପେ ପ୍ରସରିଲେ କେତେ

Couplet 7

ମୈଥୁନ ମତେ କଲା ପ୍ରଜାଯେ ପୁଣି ମନୁବଂଶେ ରାଜା

Couplet 8

ସେ ସ୍ୱାୟମ୍ଭୂବ ମନୁ ସୁତଉତ୍ତାନପାଦ ପ୍ରିୟବ୍ରତ

Couplet 9

ତେଜେ ପ୍ରଚଣ୍ତ ସେ ବିରାଜେଏ ସପ୍ତଦ୍ୱୀପା ମହୀ ଭୁଞ୍ଜେ

Couplet 10

ଯେମନ୍ତେ ଧର୍ମ ଏ ସଂସାରେରଖିଲେ କହ ମୁନିବରେ

Couplet 11

ତାର ଦୁହିତା ଅନୁପମଯାହାର ଦେବହୂତି ନାମ

Couplet 12

କର୍ଦ୍ଦମ ତାର ନିଜ ପତିତାର ଭୂବନେ ଦେବହୂତି

Couplet 13

ସେବା କରଇ ଅନୁବ୍ରତେଯେ ଧର୍ମ ପତିବ୍ରତା ମତେ

Couplet 14

ସ୍ୱାମୀ ସୁହାଗେ ସଉଭାଗ୍ୟେମୈଥୁନ ଭାବେ ରତିରଙ୍ଗେ

Couplet 15

ତାହାର ଗର୍ଭେ ପୁତ୍ର କେତେଜନ୍ମିଲେ କହ ମୋ ଅଗ୍ରତେ

Couplet 16

ତାହା ଶ୍ରବଣେ ଇଚ୍ଛା ମୋରକହ ସଦୟେ ମୁନିବର

Couplet 17

ମନୁ ତନୟା ଯେ ଆକୂତିତାହାଙ୍କୁ ରୁଚି ପ୍ରଜାପତି

Couplet 18

ବ୍ରହ୍ମଜ ଦକ୍ଷ ପ୍ରଜାପତିସେ ପୁଣ ଲଭିଣ ପ୍ରସୂତି

Couplet 19

ସୃଷ୍ଟି ସୃଜିଲେ କେଉଁଭାବେଭୋ ମୁନି ତାହା କହ ଏବେ

Couplet 20

ଏମନ୍ତ ବିଦୁରର ବାଣୀମୈତ୍ରେୟ ବୋଲେ ତାହାଶୁଣି

Couplet 21

କର୍ଦ୍ଦମେ ରାଇ ବେଦବରବୋଇଲେ ପ୍ରଜା ସୃଷ୍ଟିକର

Couplet 22

ବ୍ରହ୍ମାର ଆଜ୍ଞା ଘେନି ଶିରେମିଳିଲେ ସରସ୍ୱତୀ ତୀରେ

Couplet 23

ଅତି କଠୋର ତପ କଲାଶୁଣ ହେ ଯେତେ ଦିନ ଗଲା

Couplet 24

ଦେବଙ୍କ ଅୟୂତ ବରଷେବସିଲା ଆତ୍ମାର ବିଶ୍ୱାସେ

Couplet 25

ସମାଧି ଯୋଗରେ କର୍ଦ୍ଦମସେବିଲେ ପୁରୁଷଉତ୍ତମ

Couplet 26

ତପ ସମାଧି କ୍ରିୟା ଯୋଗେନିଶ୍ଚଳ ଭକ୍ତି ଅନୁରାଗେ

Couplet 27

ତାର ସମୀପେ ହୃଷୀକେଶତକ୍ଷଣେ ହୋଇଲେ ପ୍ରବେଶ

Couplet 28

ଶୁକ୍ଳ-କମଳ-ମାଳ ଗଳେବଦନ ଶୋଭିତ କୁଣ୍ତଳେ

Couplet 29

ଶବଦବ୍ରହ୍ମ ରୂପ ଧରିଶତେ ଆଦିତ୍ୟ ନୋହେ ସରି

Couplet 30

ଲୋଚନ ପୁଣ୍ତରୀକଦଳେସୁନ୍ଦର ଅଳକା କପୋଳେ

Couplet 31

ନିର୍ମଳ ବସ୍ତ୍ର ପରିଧାନସୁନ୍ଦର ମସ୍ତକ ଭୂଷଣ

Couplet 32

କିରୀଟ କୁଣ୍ତଳ ବିରାଜେଶଙ୍ଖ କମଳ ଗଦା ସାଜେ

Couplet 33

ଚକ୍ର ବିରାଜେ ଦକ୍ଷକରେତେଜେଣ ଦଶଦିଗ ପୁରେ

Couplet 34

ଅଧରେ ସ୍ମିତହାସ୍ୟ ଯାରବିରାଜେ ଅତି ମନୋହର

Couplet 35

ସ୍ମିତ ବାରିକ ଚକ୍ଷୁ ବେନିବିରାଜେ ନିଜ ତେଜ ଘେନି

Couplet 36

ସୁନ୍ଦର ହାସ୍ୟେ ମନ ମୋହେକୋଟି କନ୍ଦର୍ପ ସମ ନୋହେ

Couplet 37

ଗରୁଡ ସ୍କନ୍ଧେ ଆରୋହଣଅମୂଲ୍ୟ ରତ୍ନ ବିଭୂଷଣ

Couplet 38

ଭ୍ରୂଭଙ୍ଗେ ରୁଚିର ଶ୍ରୀମୁଖଦେଖନ୍ତେ ହରେ ଭବଦୁଃଖ

Couplet 39

ଶ୍ରୀବତ୍ସ ଚିହ୍ନ ହୃଦେ ସାଜେକୌସ୍ତୁଭମଣି କଣ୍ଠମାଝେ

Couplet 40

ଶୁକ୍ଳ ଶରୀର ଶୂନ୍ୟମାର୍ଗେଯେ ରୂପ ବହେ ସତ୍ୟଯୁଗେ

Couplet 41

ଶୂନ୍ୟ-ମଣ୍ତଳେ ବିଷ୍ଣୁ ଦେଖିଉଠିଲା ଆସନ ଉପେକ୍ଷି

Couplet 42

ବହୁ ବରଷ ତପ ଶ୍ରମଦେଖନ୍ତେ ଗଲା ମନ ଭ୍ରମ

Couplet 43

ରୋମ ହରଷ କଳେବରନୟନୁ ବହେ ଅଶ୍ରୁଧାର

Couplet 44

କର ଅଞ୍ଜଳି ଦେଇ ମାଥେଦଣ୍ତ ପ୍ରଣାମ ଭୂମିଗତେ

Couplet 45

ଆନନ୍ଦେ ପ୍ରାପ୍ତ ମନୋରଥଅନ୍ତରେ ହୋଇ କୃତକୃତ୍ୟ

Couplet 46

ଶ୍ରୁତି ବଚନ ମୁଖେ କହିବୋଲଇ ବିଷ୍ଣୁ ରୂପ ଚାହିଁ

Couplet 47

ଭୋ ନାଥ ତବ ଦରଶନସଫଳ କଲା ମୋ ନୟନ

Couplet 48

ଯେ ରୂପ ଦେଖିବାର ଅର୍ଥେଯୋଗ ସାଧନ୍ତି ମୁନିସନ୍ଥେ

Couplet 49

ଭୋ ନାଥ ତୋହର ଚରଣଜୀବର ପରମ କାରଣ

Couplet 50

ତୋ ପାଦପଦ୍ମ ନାବ କରିଭବସାଗରୁ ଯାନ୍ତି ତରି

Couplet 51

ଏ ଭାବ ଛାଡ଼ି ଯେ ସଂସାରେବିଷୟରସ ଆଶ୍ରେ କରେ

Couplet 52

ତାହାର ମୋକ୍ଷ ଆଉ କାହିଁସଂସାରେ ନିୟତ ଭ୍ରମଇ

Couplet 53

ନରକେ ଯାନ୍ତି ସେହି ମତେସେ ତୋତେ ପାଇବେ କେମନ୍ତେ

Couplet 54

ସେହି ପ୍ରକାରେ ମନ ମୋରକଳ୍ପଇ ବିଷୟା ଗୋଚର

Couplet 55

ତୋର ଆଦେଶେ ସୃଷ୍ଟି ଧର୍ମେକଳ୍ପଇ ଗୃହସ୍ଥ ଆଶ୍ରମେ

Couplet 56

ଯେ ଗୃହ କାମଧେନୁ ପ୍ରାୟେକୁଟୁମ୍ବ ଜନ ମନ ମୋହେ

Couplet 57

ତୋର ଚରଣ କଳ୍ପଦ୍ରୁମଆଶ୍ରେ ଲଭିବି ସର୍ବକାମ

Couplet 58

ତୋ ଅନୁଗ୍ରହେ ମନୁରାଜାକଳ୍ପିବ ତାହାର ତନୁଜା

Couplet 59

ମୁଁ ପୁଣି ସର୍ବପ୍ରାଣୀ ହିତେଯେମନ୍ତେ ତୋ ଚରଣାଗତେ

Couplet 60

ବଳି ନିବେଦି ଗୃହଧର୍ମେଯେମନ୍ତେ ରମିବି ଆଶ୍ରମେ

Couplet 61

ତୋ ପଦ ବିନୁ ଚକ୍ରଧରସେବିବି କାହାର ପୟର

Couplet 62

ତୋ ପାଦ ତାପତ୍ରୟ-ଛତ୍ରଏ କଥା ଜଗତେ ବିଦିତ

Couplet 63

ତୋ ରୂପ ଗୁଣ ଅବତାରନିର୍ମଳ ବହେ ସୁଧାଧାର

Couplet 64

ତେଣେ ଲୋଭିତ ଯାର ଚିତ୍ତସେ ନୋହେ କାଳଚକ୍ରେ ଗ୍ରସ୍ତ

Couplet 65

ତୋ କାଳଚକ୍ରର ମହିମାକେ କରିପାରେ ଗୁଣ ସୀମା

Couplet 66

ଯାହାର ବ୍ରହ୍ମରୂପୀ ଅକ୍ଷ୍ୟଭ୍ରମଣେ କେବା କରୁ ଲକ୍ଷ୍ୟ

Couplet 67

ତୃତୀୟ ଦଶ ଥର ହୋଇତ୍ରିଶତଷଷ୍ଠୀ ପର୍ବ ଯହିଁ

Couplet 68

ଅନନ୍ତ ପତ୍ର ଷଟନେମୀତ୍ରିନାଭି ଯେହୁ ବ୍ୟଗ୍ରଗାମୀ

Couplet 69

ଏ ରୂପେ ଧାମେ ଅବିରତେପ୍ରାଣୀ ଆୟୁଷ ହରେ ନିତ୍ୟେ

Couplet 70

ଏମନ୍ତ କାଳ ରୂପ ଯେହିତୋ ଭକ୍ତେ ନ ପାରଇ ସେହି

Couplet 71

ତୁ ଏକରୂପୀ ଛନ୍ନଦେହାଜଗନ୍ମୋହିନୀ ତୋର ମାୟା

Couplet 72

ତେଣେ ଏ ସୃଷ୍ଟି ସ୍ଥିତି ଅନ୍ତଯେସନେ ଉର୍ଣ୍ଣନାଭି ବତ

Couplet 73

କାମୀ ଅକାମୀ ମନ ପୂର୍ଣ୍ଣକରେ ତୋ ପାଦ କଳ୍ପଦ୍ରୁମ

Couplet 74

ତୋତେ ଜାଣନ୍ତି ଯେତେ ଜୀବେକର୍ମର ଭୋଗନାଶ ତେବେ

Couplet 75

ଆପଣେ ଆପଣା ମାୟାରୁଏ ବିଶ୍ୱ ଆବର୍ତ୍ତିତ କରୁ

Couplet 76

ତୁହି ସକଳ କାମଦାତାନିଷ୍କାମ ଜନ ମୋକ୍ଷଦାତା

Couplet 77

ଏଣୁ ମୁଁ ନିଷ୍ଠା କାମ ବଳେନମଇ ତୋ ପାଦ କମଳେ

Couplet 78

ଯେଣୁ ତୁ ଭକ୍ତି-ମୁକ୍ତିଦାତାତୋ ପାଦେ ନମୁଁ ଦୁଃଖ ହର୍ତ୍ତା

Couplet 79

ଭୋ ନାଥ ତୋହର ମହିମାକେ କହିପାରେ ଗୁଣସୀମା

Couplet 80

ଏମନ୍ତ ମୁନି ବାକ୍ୟ ଶୁଣିଗରୁଡ ସ୍କନ୍ଧେ ଚକ୍ରପାଣି

Couplet 81

ଜ୍ୟୋତି ସ୍ୱରୂପ ଶୂନ୍ୟେ ଥାଇକହନ୍ତି ମୁନି ମୁଖ ଚାହିଁ

Couplet 82

ଶୁଣ ହୋ ପ୍ରଜାପତି ସୁତମୁହିଁ ଜାଣିଲି ତୋର ଚିତ୍ତ

Couplet 83

ତୁ ଯେଣୁ ପୂଜି ମୋ ଚରଣକଳ୍ପିଲୁ ସୃଷ୍ଟିର କାରଣ

Couplet 84

ଯହିଁ ତୋହାର ମନଯୋଗପୂର୍ବେ କରିଛି ତା ସଂଯୋଗ

Couplet 85

ଅବଶ୍ୟ ତାହା କରିବଇଁମୋ ପୂଜା ବିଅର୍ଥେ ନ ଯାଇ

Couplet 86

ତୁ ଏବେ ସାବଧାନେ ଶୁଣକହିବା ତହିଁର କାରଣ

Couplet 87

ଯେ ପୂର୍ବେ ପଦ୍ମଯୋନି ତନୁସମ୍ଭୂତ ସ୍ୱାୟମ୍ଭୁବମନୁ

Couplet 88

ଯେ ପ୍ରଜାପତିଙ୍କର ପତିଯାହାର ସଦାଚାର ଖ୍ୟାତି

Couplet 89

ଏ ବ୍ରହ୍ମାବର୍ତ୍ତେ ରାଜା ହୋଇପାଳଇ ସପ୍ତଦ୍ୱୀପା ମହୀ

Couplet 90

ସେହି ଧର୍ମଜ୍ଞ ମନୁ ତୋତେଆସିବେ ଦେଖିବା ନିମନ୍ତେ

Couplet 91

ତାହାର ଶତରୂପା ନାରୀରୂପେ କମଳା ନୋହେ ସରି

Couplet 92

ସେ ବେନିଜନେ ଏକ ରଥେତୋ ରୂପ ଦେଖିବାର ଅର୍ଥେ

Couplet 93

ତୋହର ସମୀପେ ସାକ୍ଷତେମିଳିବେ ବେନିଦିନ ଅନ୍ତେ

Couplet 94

ତାର ଦୁହିତା ଦେବହୂତିରୂପେ ସମାନ ନୋହେ ରତି

Couplet 95

ତାର ବୟସ ରୂପ ଗୁଣେଅପରେ କେ ଅଛି ପ୍ରମାଣେ

Couplet 96

ତା ରୂପ ଅତି ମନୋହରତୁ ତାହା ଅନୁରୂପେ ବର

Couplet 97

ସେ କନ୍ୟା ସମର୍ପିବ ତୋତେଯେ ବିଧିବିଧାନ ଉକତେ

Couplet 98

ତୁ ମୋ ଚରଣେ ଚିତ୍ତ ଦେଇଯେତେ ବରଷ ତପ ଦାହି

Couplet 99

ନିରତେ କଲୁ ଆତ୍ମଯୋଗଏବେ ବିଷୟ ଅନୁଭୋଗ

Couplet 100

ମନୁ-ଦୁହିତା ତୋର ସଙ୍ଗେନିରତେ ଭଜୁ ଅନୁରାଗେ

Couplet 101

ସେ ତୋର ତୁଲେ କରି ଭାବନବଧା-ଗର୍ଭ ପ୍ରସବିବ

Couplet 102

ତୋହର ବୀର୍ଯ୍ୟେ ଯେତେ କନ୍ୟାଜନ୍ମିବେ ରୂପଗୁଣେ ଧନ୍ୟା

Couplet 103

ତାହାଙ୍କ ଗର୍ଭେ ଋଷିଗଣକଳ୍ପିବେ ବହୁତ ସନ୍ତାନ

Couplet 104

ତୋହର ଗୁଣ ଅନୁପମହୋଇବେ ଅନୁମତ ନାମ

Couplet 105

ତୁ ଯେ ମୋ ଆଜ୍ଞା ଶିରେ ଧରିମୋତେ ତୁ ତୀର୍ଥପ୍ରାୟ କରି

Couplet 106

ଅଶେଷ କର୍ମଫଳ ଦେଇମୋତେ ପାଇବୁ ତେଣୁ ତୁହି

Couplet 107

ଅଶେଷଭୂତେ ତୋର ଦୟାତୋତେ ନ ଲାଗୁ ବିଷ୍ଣୁ ମାୟା

Couplet 108

ଆତ୍ମାରେ ଜଗତ ଆରୋପିତୁ ଯେ ମୋହାର ଭାବେ ବ୍ୟାପି

Couplet 109

ଆତ୍ମା ସହିତେ ସର୍ବଭୂତମୋଠାରେ ହୋଇଛି ମିଳିତ

Couplet 110

ତପ ସାଧିଲୁ ଚିରକାଳେଏ ଘୋର ସଂସାର ଉଲ୍ଲୋଳେ

Couplet 111

ତୁ ମୋତେ ଆତ୍ମାରେ ଦେଖିବୁଜୀବନ ସଫଳ ଲଭିବୁ

Couplet 112

ମୁଁ ପୁଣି ପଶି ତୋର ବୀର୍ଯ୍ୟେସ୍ୱଭାବେ ବିଷ୍ଣୁଅଂଶ ତେଜେ

Couplet 113

ତୋହାର କ୍ଷେତ୍ରେ ମୁଁ ସମ୍ଭୂତହୋଇବି ଦେବହୂତି ସୁତ

Couplet 114

ତତ୍ତ୍ବ ସଂହିତା ପ୍ରଣୟନକରିବି ହୋଇ ଅବତୀର୍ଣ୍ଣ

Couplet 115

ଏମନ୍ତ କହି ମୁନି ଆଗେହରି ଚଳିଲେ ଶୂନ୍ୟମାର୍ଗେ

Couplet 116

ଗମିଲେ ବିନ୍ଦୁସରୋବରୁନିର୍ମଳ ସରସ୍ୱତୀ ତୀରୁ

Couplet 117

ସେ ନଦୀତୀରେ ପୁଷ୍ପବନେଗରୁଡ ପକ୍ଷୀ ନାଦ ସ୍ୱନେ

Couplet 118

ଭୃଙ୍ଗ ସମୂହେ ବାୟୁ ବହେଶୁଭଇ ସାମଗାନ ପ୍ରାୟେ

Couplet 119

ଏମନ୍ତେ ଶୁଣ ହୋ ବିଦୁରସେ ସ୍ୱାୟମ୍ଭୁବ ମନୁବର

Couplet 120

ସୁବର୍ଣ୍ଣ ଆଚ୍ଛାଦିତ ରଥେଆରୋହି ପାରିଷଦ ଯେତେ

Couplet 121

ସଙ୍ଗତେ ଘେନି ଦେବହୂତିଭୂମି ପର୍ଯ୍ୟଟନ କରନ୍ତି

Couplet 122

ମିଳିଲେ କର୍ଦ୍ଦମ ଆଶ୍ରମେବିଷ୍ଣୁର କହିଥିବା ଦିନେ

Couplet 123

ନିର୍ମଳ ସରସ୍ୱତୀ ତୀରେମିଳିଲେ ବିନ୍ଦୁ ସରୋବରେ

Couplet 124

ଦେଖିଲେ କର୍ଦ୍ଦମ ଶରୀରତପ ସାଧନେ କୃଶତର

Couplet 125

ପୂର୍ବେ ଯେ ସରସ୍ୱତୀ କୂଳେବିଷ୍ଣୁ ମିଳିଲେ ଋଷିମେଳେ

Couplet 126

ଦେଖି ତାହାଙ୍କ ଭକ୍ତିଭାବତନୁ ପୁଲକ ପଦ୍ମନାଭ

Couplet 127

ସ୍ୱଭାବେ ଭକ୍ତଜନବନ୍ଧୁନୟନୁ ଅଶ୍ରୁ ଜଳବିନ୍ଦୁ

Couplet 128

ପଡିଲା ସରସ୍ୱତୀ ନୀରତେଣୁ ବୋଲାଇ ବିନ୍ଦୁସର

Couplet 129

ସେ ବନ ସାମାନ୍ୟ ନୋହରଯହିଁରେ ପ୍ରଭୁ ଭାବଗ୍ରାହୀ

Couplet 130

କର୍ଦ୍ଦମ ପ୍ରତି ଦୟା କରିପତିତ କଲେ ନେତ୍ର ବାରି

Couplet 131

ପୁଣ୍ୟ ପବିତ୍ର ସୁଧା ଜଳସ୍ୱଭାବେ ନିର୍ମଳ ଶୀତଳ

Couplet 132

ଯେ ପୁଣ୍ୟଜଳ ମୁନିଗଣେସେବା କରନ୍ତି ଅନୁକ୍ଷଣେ

Couplet 133

ପବିତ୍ର ଦ୍ରୁମଲତା ଘନେନାଦ କରନ୍ତି ପକ୍ଷୀଗଣେ

Couplet 134

କ୍ରୀଡନ୍ତି ନାନା ବନଜୀବେଗଭୀର ଶୁଭେ ଭୃଙ୍ଗରବେ

Couplet 135

ସକଳ ଋତୁ ଫଳ ନାହିଁପୁଷ୍ପ ପଲ୍ଲବ ବିରାଜଇ

Couplet 136

ମତ୍ତ-ମୟୂର ଯୂଥ ଯୂଥକୋକିଳ ରାବ ସୁଲଳିତ

Couplet 137

ପ୍ରମତ୍ତ ଭ୍ରମର ନିକରେନାନା ପ୍ରକାରେ କ୍ରୀଡ଼ା କରେ

Couplet 138

କଦମ୍ବ ଚମ୍ପକ ଅଶୋକନାଗକେଶ୍ୱର କୁରୁବକ

Couplet 139

କରଞ୍ଜ ପନସ ଅସନକୁନ୍ଦ ମନ୍ଦାର ଚୂତବନ

Couplet 140

ହଂସ ସାରସ ବକପନ୍ତିଜଳକୁକ୍କୁଟ ରାବ ଦ୍ୟନ୍ତି

Couplet 141

ଚକୋର ଚକ୍ରବାକ ବାଣୀଅତି ଗଭୀର ପରିମାଣି

Couplet 142

ଗୟଳ ଶଲ୍ଲକ କୁଞ୍ଜରକୁରଙ୍ଗ ହରିଣ ଶୂକର

Couplet 143

ବାନର ଗୋଲାଙ୍ଗୁଳ ସାଜେନକୁଳ କସ୍ତୁରୀ ବିରାଜେ

Couplet 144

ସେ ତୀର୍ଥବରେ ଆଦିରାଜାରଥେ ମିଳିଲେ ମହାତେଜା

Couplet 145

କଳତ୍ର ଦୁହିତା ସମେତେପ୍ରବେଶ ହେଲା ରତ୍ନପଥେ

Couplet 146

ଦେଖିଲା ମୁନିଙ୍କ ବଦନସ୍ୱଭାବେ ଦ୍ରୁତ ହୁତାଶନ

Couplet 147

ସ୍ୱଭାବେ ଘୋରତପ ତେଜେସୁନ୍ଦର ଶରୀର ବିରାଜେ

Couplet 148

ବିଷ୍ଣୁ ଜନ୍ମିବେ ଯା ଶରୀରେସୁନ୍ଦର କେତେକ ମାତରେ

Couplet 149

ଅମୃତ ତୁଲ୍ୟ ବିଷ୍ଣୁବାଣୀସେ ମୁନି କର୍ଣ୍ଣପଥେ ଶୁଣି

Couplet 150

ରୋମ ପୁଲକ କଳେବରନେତ୍ରେ ଆନନ୍ଦ ଅଶ୍ରୁଧାର

Couplet 151

ଶିରେ ସୁନ୍ଦର ଶୋହେ ଜଟାବସନ ଚିରାଣି କାଛଟା

Couplet 152

ସେ ମୁନି ମଳିନ ଯେ ଗାତ୍ରରତ୍ନ ଯେସନେ ଅସଂସ୍କୃତ

Couplet 153

ଏମନ୍ତ ଦେଖି ନୃପମଣିସଙ୍ଗତେ ନିଜ ପତ୍ନୀ ଘେନି

Couplet 154

ରଥୁ ତୁରିତେ ଅବତରିମୁନି ସମୀପେ ଦଣ୍ତଧାରୀ

Couplet 155

ମିଳିଲେ ଯୋଡି ବେନିପାଣିପାଦେ ପ୍ରଣାମ କଲେ ପୁଣି

Couplet 156

ଦେଖି ଉଠିଲେ ମୁନି ବେଗେଆଶିଷ କଲେ ମନ୍ତ୍ରଯୋଗେ

Couplet 157

ବିଷ୍ଣୁ ଆଦେଶ ଗୁଣି ମନେଆନନ୍ଦ ଉଲ୍ଲୋଳ ଲୋଚନେ

Couplet 158

ପୂଜିଲେ ବସାଇ ଆସନେକହନ୍ତି ଅମୃତ ବଚନେ

Couplet 159

ରାଜ କୁଶଳ ପ୍ରଶ୍ନବାଣୀସନ୍ତୋଷେ ପୁଚ୍ଛେ ବିପ୍ରମଣି

Couplet 160

ତୋ ଆଗମନେ ନୃପବରଧନ୍ୟ ଏ ଆଶ୍ରମ ମୋହର

Couplet 161

ତୁମ୍ଭ ଭ୍ରମଣ ଏ ଜଗତେସାଧୁଜନଙ୍କ ରକ୍ଷା ଅର୍ଥେ

Couplet 162

ଅସାଧୁଜନ ବିନାଶନେନିଶ୍ଚଳେ ଧର୍ମର ସ୍ଥାପନେ

Couplet 163

ରବି ଶଶାଙ୍କ ଅଗ୍ନି ଯମଇନ୍ଦ୍ର ବରୁଣ ବାତ ଧର୍ମ

Couplet 164

ଏ ଅଷ୍ଟ-ଦିଗପାଳ ତେଜଏଣୁ କ୍ଷତ୍ରିୟ ଅଷ୍ଟଭୁଜ

Couplet 165

ଏଣୁ ତୁମ୍ଭଙ୍କୁ ନମସ୍କାରତୁ ଧର୍ମମୂର୍ତ୍ତି ନୃପବର

Couplet 166

ରଥ ଆରୋହି ତୋ ବିହାରଅସତଜନ ଗର୍ବ ହର

Couplet 167

ଘୋର-ଗର୍ଜନ ଧନୁ-ରବେଉଦ୍ଦଣ୍ତ ସଂଗ୍ରାମ ଉତ୍ସବେ

Couplet 168

ବେଷ୍ଟିତ ଚତୁରଙ୍ଗ ବଳେକମ୍ପାଇ ଅବନୀ ମଣ୍ତଳେ

Couplet 169

ସୂର୍ଯ୍ୟର ପ୍ରାୟେ ତେଜ ଧରିଖେଟ ଖର୍ବଟ ବନଗିରି

Couplet 170

ଶତ୍ରୁ ବିନାଶେ ସାବଧାନେକ୍ଷତ୍ରିୟଧର୍ମ ଏ ପ୍ରମାଣେ

Couplet 171

ଏହା ନ କରି ଯେବେ ଘରେସୁଖଶୟନେ ନିଦ୍ରା କରେ

Couplet 172

ତେବେ ଅସତ ରିପୁ ବଳନାଶନ୍ତି ଭୁବନ ମଣ୍ତଳ

Couplet 173

ତଥାପି ଶୁଣ ହେ ରାଜନଯେ ଅର୍ଥେ ତୁମ୍ଭ ଆଗମନ

Couplet 174

ତୁମ୍ଭର ପ୍ରିୟଭାବ ବହିସୁହୃଦ ଭାବେ କରିବଇଁ

Couplet 175

ଏମନ୍ତ କହି ରାଜା ଆଗେକର୍ଦ୍ଦମ ଅତି ସଉଭାଗ୍ୟେ

Couplet 176

ବିଷ୍ଣୁର ବଚନ ସୁମରିଅଧିକ ପ୍ରିୟଭାବ ଭାରି

Couplet 177

ସେ ମୁନି ଚରଣ ପଙ୍କଜେବ୍ରାହ୍ମଣ ଜଗନ୍ନାଥ ଭଜେ